Kataluniako prozesu independistan parte hartu zuten buruzagiak zigortzen ari zirenean eta prozesua gainbeheran zegoenean sortu zuten Ehun, 2019ko azaroan. "Egitura politiko nagusien kontrako norabidean" igeri egiteko eta independentzia prozesuak aldebakartasunari lehentasuna eman behar ziola aldarrikatzeko osatu zuten, mugimenduak ohar batean adierazi duenez. Bost urteren ondoren, ohar berean iragarri du Ehun desegin egingo dutela, jabetu ostean independentziaren aldeko ekintzak ezin dituztela bakarrik egin.

Mugimendua desegiteko arrazoi nagusi gisa aipatu dute independentziaren aldeko ekimenak aurrera ateratzeko "baliabide humano eta ekonomiko nahikorik" ez izatea, baita Euskal Herriko "elite independentistak" lana "izugarri zaildu" izana ere: "Elite independentistak Espainian ezinezkoa zela esateari utzi eta Espainian aukera leihoa zegoela esaten hasi zenean ekin genion bideari, eta honen ezezkoak suposatu duen lan gehigarriari aurre egiteko Ehun ez da nahikoa izan. Horregatik, lan hau bakarrik ezin dugula aurrera atera onartuta, Ehun itzaltzea erabaki dugu".

Oharrean adierazi dute mugimendua "konfrontazio egokiaren beharra" azpimarratzen aritu dela azken bost urteetan, eta sinesgarritasuna lortu dutela uste dute: "Gure ildo estrategikoa guk markatu dugu, ez beste inork". Euren arabera, jendartearen zentzu komunarekin bat egitea ere lortu dute, denek, independistak ez direnek ere, baitakite Espainiak eta Frantziak ez dutela "sekula" autodeterminazio eskubiderik onartuko.

"Itzali" aurretik, azken ekintza

"Itzali" aurretik, Euskal Herri osoko 101 udaletan independentzia mozioak erregistratuko dituztela iragarri du Ehunek, herri horietako herritarrei eta alderdiei euskal errepublikaren aldeko prozesuan urratsak egiteko. Mozio horien bidez, udalek euskal errepublikaren kidetzat jo dezakete euren burua. Hala egin zuen Plentziako Udalak (Bizkaia) iazko maiatzean, eta horrek "herritar askoren ilusioa" piztu zuela ikusita, mozioa herri gehiagotara eramatea erabaki du Ehunek, desegin aurretik independentziaren aldeko azken ekintza gisa.