Teknikariok sindikatuko zuzeneko ikuskizun eta ekitaldietako teknikarien kolektiboak salatu duenez, "alarma egoera etengabean" jarraitzen dute” eta sektoreko profesional gehienak "muturreko egoeran" daude. Edukiera mugatuta eta murriztuta duten ikuskizunak pixkanaka itzuli diren arren, euren baldintzek ez dute hobera egin.

Ostegunean, uztailak 2, Eusko Jaurlaritzak Bilbon duen egoitzaren aurrean egin dute elkarretaratzea. Profesionalek galtzadaren zati bat okupatu eta euren aldarrikapenak helarazi dizkiote Jaurlaritzari; besteak beste, "zuzeneko sektore eszenikoaren erregulazioa". Erregimen arautzaile propiorik ez dutenez, "ikusezin" sentitzen dira, eta “jardueraren barruan prekarizazioaren ondorioak pairatu behar dituzte".

Antxon Unzaga Teknikarioakeko bozeramaileak adierazi duenez, zuzeneko ikuskizun eta ekitaldietako teknikariek "babesa eskatzen dute ikuskizunaren munduan lan egiten jarraitzeko duten gaitasuna babesten duen kolektiboarentzat", eta egun, "langabeziaren zinezko arriskuan" daude. Ohartarazi dutenez, “bizirautea ezinezkoa egiten duten laguntza eskasak” baino ez dituzte, eta “sektorearen zati txiki bati” baino ez diote egiten mesede.

Prekarizazioa ordutegietan, laneko segurtasunean eta langabeziagatiko laguntzak jasotzeko eskubidean nabarmentzen dute batez ere. Lan berdinak egin arren, hainbat kontratazio-mota dituzte, hala nola, soldatapeko finkoak, aldi baterakoak, obrakoak, zerbitzukoak edota autonomoen erregimeneko altakoak. Hori dela eta, Eusko Jaurlaritzari eskatu diote, lehenik eta behin, ikuskizunetako eta ekitaldietako langileentzat “laguntzen osagarria onartzeko”, 1.200 euroko soldata, egin ditzaketen lanek "gutxieneko diru-sarrerak" bermatu artean