Urtea bukatzeko oraindik hilabete batzuk falta direnean, EAEko hainbat udal kexu dira, aurreikusitako diru kopuruak ez diolako errealitateari erantzuten. Donostiak dagoeneko ahitu ditu urte osorako emandako diruak. 1,2 milioi jaso zituen, eta kopuru hori 1.456 familiaren artean banatu du jada. Jon Albizu Gizarte Ongintzako Donostiako zinegotziak (Bildu) adierazi du, 1,3 milioira arteko gastua egin dutela, eta oraindik urte amaierara bitartean aurreikusi gabeko beste 900.000 euro jarri beharko dituela Udalak bere kontutik.

2012an bezala, 2013an ere 17,3 milioi banatu ditu Jaurlaritzak Larrialdietako Gizarte Laguntzarako. Eskariak gora egin du ordea, krisiak gogor jo duen urte honetan.

2010ean Enplegu eta Politika sozialetako sailburu zen Gemma Zabaletak zorroztu egin zituen larrialdietako diru laguntzak eskatzeko neurriak. Protestek gora egin ahala, ordea, 2010eko udaran, ezarritako neurria baretu ez, baina banatzeko diru kopurua 17,3 milioitik 24 milioi eurora igo zuen. Halere, Eudelek salatu zuen, lehen laguntza eskatzen zutenen %35ak neurri horiekin ezin izango zuela diru hori jasotzen jarraitu.

PSE-EEk aurreko urteetan egindako moldaketak deuseztatuta, 2013ko apirilean eskaerak egiteko neurriak zabaldu zituzten, eta Aburto kontseilariak gestio hobea espero du. Zenbait udal ordea, dagoeneko dirua bukatu zaiela eta gehiago behar dela salatzen ari dira.