Europako Batzordeak ezohiko neurriak hartuko ditu azken urteetan zeresan gehien eragin duen ate birakari kasuari erantzunez. José Manuel Durão Barroso Batzordeko aurreko presidentea Goldman Sachs inbertsio-bankuaren aholkulari hasi zenean, uztailean, fitxaketa EBren arauak betez egin zela defendatu zuen Bruselak. Orain, ordea, Jean-Claude Juncker presidenteak, Europako Arartekoaren eskari bati ihardetsiz, iragarri du ikertu egingo dutela Barrosoren zeregin berriak ondorio etikorik ba ote duen. Gainera, protokolozko pribilegioak kenduko dizkiote Batzordeko buru izandakoari.
EBko komisario ohiek Batzordea utzi eta ondorengo hamazortzi hilabeteetan hartzen dituzten karguen berri eman behar diote batzorde etiko bati. Barroso joan den uztailean hasi zen Goldman Sachsen, europar erakundeei jakinarazi gabe baina presidente izateari utzi eta hogei hilabetera; horregatik, ezer irregularrik ez zegoela adierazi zuen Europako Batzordeak.
Alabaina, europar funtzionario talde batek 100.000 izenpe baino gehiago bildu zituen change.org plataformaren bidez, Goldman Sachsentzat lanean hasteagatik Barrosoren aurkako neurri eredugarriak eskatuz –besteak beste, presidente ohia izateagatik dagokion pentsioa kentzea–. Azkenik, Emily O-Reilly Arartekoak presidente ohiaren “ardura eta zeregin berriei buruzko azalpenak” eskatu zituen.
Beste edozein lobbygile bezala
Batzordeak, Jean-Claude Junckerren ahotik, azkar bai azkar erantzun dio O´Reillyri, noiz eta Europako kurtso politikoa irekitzear denean, Legebiltzarrean Batasunaren egoerari buruzko eztabaida eginez. Junckerrek iragarri du Barrosoren kargu berriaren alderdi etikoak ikertuko dituztela, eta presidente ohia izateagatik zegokion “pribilegiozko sarbidea” galdu egingo duela. Aurrerantzean, beste edozein lobbygile bezala tratatua izango da Barroso. Haren egiteko berrien artean, Brexitak Goldman Sachsentzat izan ditzakeen ondorioez aholku ematea dago.
Finantza-enpresa ezagunak, besteak beste, parte hartu zuen Greziaren zor publikoa urte luzez ezkutatzeko egindako operazioan, Europako Batzordeko presidentea Barroso bera zela.