Juan Karlos Izagirre Donostiako alkateak, epaimahaiari eskerrak eman ondoren, euskaraz eta gazteleraz azaldu zuen ohorea dela hautatua izatea, baina garrantzitsuena esperientzia dela. Euskara –"Donostiako hizkuntza propioa"– eta euskal kultura garrantzitsuak direla azaldu zuen. "Europa honetan hizkuntza txikiak garrantzitsuak dira eta guk gurea azaldu nahi dugu. Aniztasuna eta txikitasunaren balioak defendatu nahi ditugu. Gure herria ez da ezer euskararik gabe eta herria egingo dugu euskararekin, gure kulturaren motor nagusia bihurtuz". Normalizazio politikoak proiektu honetan izan dezakeen garrantzia ere azpimarratu zuen. Donostiak Poloniako Wroclaw hiriarekin partekartuko du Europako kultur hiriburutza.

Donostiaren hautaketak kritika biziak eragin ditu Espainiako hainbat sektore politikotan, hautagai ziren hainbat hiritatik hasita. Juan Antonio Belloch Zaragozako alkatearen ustez aukeraketa "astakeria" da, ekitaldi kulturalak Bilduk propaganda egiteko baliatuko dituela uste baitu. Rosa Aguilar Espainiako Ingurugiro ministroak "akats handi" gisa definitu du epaimaiharen erabakia. Bere ustez, "bakerako bidea beste era batean indartzen da, armak utziz eta puntua eta amaiera jarriz. Hemen aukeratzen zena hiriburutza kulturala zen". Antzeko eran mintzatu dira gainerako hautagaitzetako kideak, erabakiaren atzetik "arrazoi politikoak" ikusi dituztenak.

Ainara Martin Donostiako hautagaitzako bulegoko zuzendari albokoaren ustez, ordea, "maila politikoan orain gertatu dena gure egitasmoaren esentzia bera da: elkarbizitzarako kultura".