Abadiñon huste bat gauzatu eta gutxira, berriz ere Bizkaian esku hartuko dutela jakinarazi du Desokupak. Enpresako buru Daniel Estevek Desokupa TV saioan jakinarazi du datorren astean Bilbon esku hartuko dutela, txalo eta algara artean. Mezu berean, Ertzaintzari eskerrak eman dizkio.

Desokupak Euskal Herrian egindako azken esku hartzeak hautsak harrotu ditu, batik bat Ertzaintzak horiekin izandako harremanarekin loturan. Giroa oraindik bero dagoela heldu da Bilbon burutu asmo duten esku hartze berriaren jakinarazpena.

Apirilaren 15ean egin zuen agerpena Desokupak Abadiñon, etxebizitza bat husteko kontratatu baitzuen etxe jabeak. Abadiñoko Gazte Asanbladak jakinarazi zuenez, “bortxaz” eta “agindu judizialik gabe” gauzatu zuten hustea. Ertzaintza ere han egon zen, eraikinaren ateetan bildutako jendearen aurka oldartuz. Behin desalojoa gauzatuta Desokupako kide Estevek hustu berri zuen etxean bertan grabatutako bideo batean eskerrak helarazi zizkioen Ertzaintzari, “gertutik babes pixka bat” emateagatik.

Desokupa «agradece» a la Ertzaintza su «apoyo» ante un colectivo de «kale borroka» que había para impedir el desalojo de Abadiño. A ver cómo explica la Ertzaintza y el departamento de seguridad está colaboración con este grupo de nazis. pic.twitter.com/1xSp5T845h

— Igor Goikolea (@goikoleaigor) April 15, 2021

Ertzaintzaren eta Desokuparen arteko harremanak sortutako arrabotsaren aurrean, ostiralean Josu Erkorekak Segurtasun sailburuak Legebiltzarrean adierazi zuen Ertzaintzak Desokuparekin ez duela izan “inongo kontakturik, ez desalojoaren aurretik, ez bitartean, ez ondoren”. Astelehenean Desokupak argitaratutako bideo batek gezurtatu egiten ditu adierazpenok ordea, bertan jasotzen baita Desokupako kide baten eta Ertzaintzaren patruila baten arteko elkarrizketa, zeinetan esku hartzearen gaineko informazioa trukatzen duten.

«La Ertzaintza, con la empresa Desokupa, no tuvo ninguna relación ni antes, ni durante, ni después del desalojo de Abadiño», Josu Erkoreka, Consejero de Seguridad (30-04-2021).

Más imágenes que confirman la colaboración entre la Policía Autonómica Vasca y este grupo de nazis. pic.twitter.com/1Z6y7xcSJM

— Igor Goikolea (@goikoleaigor) May 3, 2021

Eskuin muturrarekin lotura duen enpresa

Desokupa enpresak desalojo estrajudizialak egiten ditu, legezkotasunaren mugetan eta bortxaz jardunez, eta ezagun da enpresako kideek eskuin muturrarekin duten lotura. Enpresak egoitza nagusia Bartzelonan duen arren, zerbitzuak eskaintzen dituzte Espainiako Estatu guztian. “Ilegalki okupatuta dauden edo maizter prekarioak dituzten etxebizitzen etxegabetzeetan berezitutako enpresa gara. Berehalako etxegabetzeen formula legezkoaren sortzaile eta aitzindariak”, diote beren webgunean. Darabilten indarkeria ageriko egin da hainbat alditan; 2018an adibidez, Katalunian, etxekaleratu zutenean abortua eragin ziotela salatu zuen emakume batek.