Donald Trumpen agintaldiaren bukaera eta Joe Biden demokratari lekukoa uzteko eguna dute AEBetan. Ekitaldia 12:00etan hasiko da –Euskal Herriko 18:00etan–. Washington hiria erabat barrikadaturik dute, beste 50 estatuetako hiriburuetan ere polizia eta armadaren presentzia areagoturik dutela.
Iritsi zaie D Day ala E Eguna amerikarrei: Donald Trumpen agintaldiaren bukaera eta Joe Biden demokratari lekukoa uzteko eguna. Ez da, ordea, Washingtonen egonen Trump. Agenda ofizialean ondokoa zehazturik du: "Trump presidentea goizean goiz hasiko da lanean, gau beltza arte. Telefono dei asko pasako ditu, eta bilera anitz ukango ditu". Bistan da, bere ohiturari segi, txio bidez zabaldu zuen erabakia. "Gauza ona da" Bidenen iritziz. 152 urtean bere ondorengoaren kargu hartze ekitaldira joan ez den lehendabiziko agintaria dute Trump – Andrew Johnsonek ez zuen parte hartu 1869an–. Mike Pence presidente-orde izandakoa egonen da bertan.
Usaian ez bezala, ekitaldia internet bidez segituko dute herritarrek, hauen ordez 200.000 bandera jarri dituztelarik Kapitolioaren aitzinean. 200.000 bandera eta 25.000 soldadu – Irak eta Afganistanen diren soldadu kopurua bider bost–. COVID-19 izurriteak ondorioztaturiko aldaketa dute hau, eta nola ez, segurtasuna bermatzeko nonbait eskerturikoa. Duela bi aste Trumpen hamarnaka jarraitzaile Kapitolioan sartu ziren, Bidenen garaipenaren egiaztatzea blokeatzeko. Oroit gara egun horretako goizean berriz ere Trumpek argi utzi zuela porrota ez zuela sekulan onartuko, eta Kongresuan burutzekoa zen hitzordua oztopatzera deitu zituela bere jarraitzaileak. Halakorik errepikatzea ez dute nahi, eta ikusiz Washington hiri barrikadatura sartzea ia ezinezkoa dela, nekez irudikatu dezakegu kargu-hartze ekitalditik kanpo gertaturiko zeozer. Aitzineko egunetan, FBIk adierazi zuen soldaduen baitako baten partetik egon daitekeen eraso arriskua hor dagoela. Ikustekoa ordea, nola pasako den eguna AEBetako 50 estatuetako hiriburuetan, zeinetan Trumpen aldekoek manifestazioak egitekoak dituzten.
Bibliaren gainean eskua jarrita, otoitz batekin hasiko da gaurko saioa; Bidenen eta Kamala Harris presidente ordearen diskurtsoekin segituz –nola ez, batasunaren mezua zabalduko du Bidenek erabat zatiturik diren AEBetako herritarrei–, eta Lady Gagak zabalduko du himno nazionala. Kate Bedingfield Bidenen komunikazio zuzendariaren arabera, "azken lau urteetan sortutako gorrotoa eta zatiketa gainditzeko egingo du lan Bidenek". "AEBei leialtasuna" erakutsiko duela hitz emanen du herritar batek, ohiturari segi. Ondotik, Harris eta Barack Obama, George W. Bush eta Bill Clinton presidente ohiak Arlingtongo hilerri nazionalera joango dira, "Soldadu Ezezagunaren hilobian lore-koroa bat uzteko". Kapitoletik Etxe Zurira doan usaiako desfile militarrik ez aldi honetan, ez eta inbestidura-dantzaldirik ere.
Orotara, eta berehala, hamazazpi neurri berri hartuko dituela jakinarazi du Bidenek, Trumpen politika batzuekin bukatzeko. Klima larrialdiari dagokionez adosturiko Parisko Akordioan zein Munduko Osasun Erakundean AEBak berriz ere sartzea, zein koronabirusari begira babes-neurri gogorragoak bideratzea, hainbat neurri hartuko ditu. Bertan behera utziko du ere bere aitzinekoak onartutako migrazio-dekretu arrazista bat, zeinek AEBetara sartzea debekatzen zien gehiengoan musulmanak ziren estatuetako herritarrei. Neurri hori "xenofobian eta animotasun erlijiosoan errotuta" zegoelako, Jake Sullivan Etxe Zuriko Segurtasun Nazionaleko etorkizuneko kontseilariaren hitzetan. Mexikorekin muga areagotzeko paretaren eraikitzea ezeztatzeko bidea ere irekiko du Bidenek.