Arrakasta handia lortu du Twitterren La Sauvage Jaune erabiltzaileak zabaldutako irudi batek. Bertan, zenbait emakume musulmanek hondartzan erabiltzen duten janzkera konparatzen da gorputza "gehiegi erakusten" duten emakumeek ere entzun behar izaten dituzten komentarioekin.

Alde batean ilea zapiz estaltzen duenaren "sumisioa", bestean makillatuta doalako "puta baten itxura" daukana; "estaliegi" doanari arropa kentzeko agindua, eta bularrak biluzik erakusten dituenari, berriz, estaltzekoa. Galtza luzeak: gaizki. Galtza motzak: gaizki. Hanketako ileak kentzen ez dituzten emakumeei sarri leporatzen zaien "zikinkeria" ere ez du ahaztu marrazkiak.

Modu irudimentsu horretan salatu du marrazkilariak problema ez dela hainbeste janzkera jakin batek emakumeak zapaltzen dituen ala ez, mota askotako emakumeek, zernahi egiten dutela ere, zapalkuntza jasaten dutela baizik.

Zeresana eragin duenik behintzat ezin uka: lerro hauek idatzi diren unean 6.500 bertxio baino gehiago eta erantzun ugari eragin ditu jatorrizko txioak.