Portugalen ehunka pertsona kalera atera dira abuztuaren 4an indarkeria arrazistaren aurka protesta egiteko. Uztailaren 25ean Bruno Candé aktore beltza kalean tiroz hil zuten. 13: 00ak aldera, Candé banku publiko batean eserita zegoen, bere txakurrarekin batera, eta, orduan, gizon zuri batek lau tiro egin zizkion. Lekukoen arabera, Candéri tiro egin zion, hitzik esan gabe, eta hainbat pertsonak geldiarazi zuten, Poliziak atxilotu zuen arte.

Krimenak Portugalen zalaparta eragin du eta arrazakeriaren inguruko eztabaida zabaldu du berriro, 'Black Lives Matter' mugimenduak piztutako arrabotsarekin bat eginez. Lisboako arrazismoaren aurkako taldeak mobilizatu egin dira kasua aditzera emateko.

“Arrazakeriak berriro hil egin du: Justizia Bruno Canderen alde” lelopean, Portugalgo mugimendu antiarrazistaren hainbat taldek eta hildakoaren familiak antolatu dute protesta. Beste erakunde batzuk ere elkartu dira, Fronte Unitario Antifaxista kasu.

Manifestariak Lisboako Rossio plazan bildu eta bertan D. Maria II Antzoki Nazionalaren eraikinaren alboko fatxadaren gainean Candéren argazkia zuen pankarta bat zabaldu zuten.