Asko aipatu den arren haurren artean arazo gutxi sortu duela koronabirusak, Britainia Handiko Osasun ministerioak alerta ohar bat igorri die medikuei adi egon daitezen: asteotan ume batzuk Zaintza Intentsiboko Unitateetan sartu behar izan dituzte bai Kawasaki sindromearen eta bai koronabirusaren sintomak nozitzeagatik. Italia, Australia eta beste lekuetako medikuek ere aurkitu dituzte antzeko koadroak adin txikiko gaixo batzeuen artean.
Erresuma Batuko osasun zebitzuak alerta ohar bat igorri die medikuei adieraziz ospitaleetan zaintza intentsiboetan ezarri behar izan dituztela birikez gain heste, bihotz eta beste organoetako inflamazio anitzak zeuzkaten ume batzuk: "Gero eta kezka handiagoa dago ea Covid-19ari lotutako inflamazio sindrome bat azaltzen ari ote den Erresuma Batuko umeen artean edo eta gerta daitekeelako kasu horiek egotea lotuta oraindik indentifikatu gabeko patogeno baten kutsadurari".
Sindrome berezi honek Covid-19 larri batek dauzkan sintomen antza dauka eta, aldi berean, shock toxiko batekin eta Kawasakiren gaixotasuna deitutakoarenekin ere badauzka antzekotasunak. Patologia honek haur horiei eragiten die zainak hantu eta inflamatzea, hesteetako minak eta bihotzaren inflamazioa. Gobernu britainiarrak dioenez sindrome hori garatu duten ume askok eman dute positibo Covid-19 frogan, baina ez guztiek, eta honek areago konplikatzen du ikerketa.
Ume bakan batzuek koronabirusaren antzeko sintomak edukitzetik oso larri egotera eta bakar batzuek hiltzera ere eraman izana ez da, hala ere, Britainia Handian soilik gertatu. Italiako mediku eta ikerlariak ere arazo horrekin ari dira borrokan eta Australiatik ere zabaldu dira antzeko berriak. Italiari dagokionez, koronabirusak hain gogor zigortutako Bergamoko ospitale batean hilabete honetan 20 inflamazio baskular larri aurkitu zaizkie umeen artean, nahiz eta horietatik gutxi batzuek eman positibo koronabirus testean. Alabaina, bertako medikuek azaldu zuten Madril eta Lisboako pediatriako kardiologoek antzeko kasuak aipatuak dizkietela.
The Guardian-ek galdekatu dituen pediatra batzuek, argi utzita oso bakanak direla aipatu kasu larriak eta ez dutela alferrikako alarmarik eragin nahi jendearean artan, bai nahi dituzte ohartarazi beste pediatrak gaiarekin erne ibili daitezen. "Gure kezka da pediatrek ikusten dituztenean sukarra eta hesteetako mina daukatenak egingo dizkietela odol analisiak apendizitisa bezalako arazoen bila, baina ez inflamazio arazoak detektatzeko odol analisiak".
Doktore horien susmoa da sindrome hau izan daitekeela "inflamazio-osteko erantzun inflamatorioa", immunitate sistemak kanpoko eraso baten aurrean neurriz gaineko erreakzioa edukitzean sortutakoa. Eta haurretako batzuek koronabirus testean negatibo eman izana ere gerta daitekeela inflamazioa jazo baino lehen birusa desagertu izanagatik edo, besterik gabe, testak errorea emateagatik.
Gai honek, hala ere, argitara dakar Covid-19aren alarma honetan gutxiegi aipatua den beste osagai bat: infekzio bat gerta litekeela zenbait eritasun autoimmune abian jartzeko kausa. Ezaguna da immunitate sistemaren gehiegizko erreakzioari lotutako hainbat gaixotasunen –artritisak, esaterako, baina immunitatea inplikatuta dagoen beste asko berdin– 'supiztaileak' izan daiztezkeela infekzioak, pizten dute erantzun immunitarioa eta behin honen garrak indarra hartu dutenean infekzioa desagertu ostean ere martxan segitzen du suteak.