Azaroaren 13an heldu zen Boliviako egoerari buruzko eztabaida Europako Parlamentura. Presidente auto-izendatu Jeanine Añezi zilegitasuna eman eta Bolivian estatu kolperik ez dela izan berretsi du parlamentarien gehiengoak, EAJ, PP, Ciudadanos eta Vox alderdien babesarekin, besteak beste.
Parlamentarien eserlekuen erdia hutsik zela, Boliviari buruzko eztabaida izan zen azaroaren 13an Europako Parlamentuan. Hasi baino lehen, eztabaidaren izenak eragin zuen lehen bozketa. Ezkerreko zenbait indarrek proposatu zuten "Boliviako egoerari buruz" izendapen aseptikoa "Bolivia, estatu kolpearen ostean" izenarengatik ordezkatzea. 41ek soilik babestu zuten mozioa, 88 abstenitu eta 234 kontra azaldu ziren.
Bolivian estatu kolpea izan dela adieraztearen aurka sozialdemokrazia banatuta agertu zen – adibidez, PSOEko parlamentari batzuk alde, eta beste batzuk kontra agertu ziren–, baina eskuina eta indar neofaxista guztiek elkartuta bozkatu zuten. Horien artean PP, Ciudadanos, Vox eta EAJ. Ciudadanosen talde berean –Europar Liberalak– dago EAJ Europan. Haren kide Izaskun Bilbao europarlamentariak adierazi zuen Evo Moralesen agintea "inkonstituzionala" dela, eta hauteskundeak berriz egin behar direla babestu zuen, baina oraingoan "sinesgarriak" eta "berme guztiekin". Venezuelako kasuan ere ildo beretik jokatu zuen EAJk. Lehen unetik Juan Guaidó kolpistari babesa eskaini zion indarretako bat izan zen.
Bolivian "botere hutsunerik egon ez dadin", Jeanine Añez politikari eskuindar ultrakatolikoaren izendapena zilegitzat jo dute. Biblia eskuan izendatu zuen bere burua Boliviako estatu laikoaren presidente Añezek. Sare sozialetan haren "mundu ikuskeraren" berri eman du Añezek aho bilorik gabe.
Al diablo no se le rinde culto jamás!!! pic.twitter.com/LINPHd2kI9
— Jeanine Añez Chavez (@JeanineAnez) October 28, 2015
Armada eta Poliziari zigorgabetasuna eman die Añezek
Dekretu baten bidez, Boliviako behin-behineko presidente kolpistak, estatu kolpearen aurkako manifestazioen kontra egiteko agindu dio Boliviako armadari eta "egoeraren larriaren arabera" jarduteko eskatu die soldaduei. Hala "erantzukizun penaletik" salbuetsi ditu, hau da, militarrei zigorgabetasuna agindu die estatu kolpearen aurka kalera ateratzen ari diren zibilak erreprimitzeko, eraso egiteko edota legez kanpo atxilotzeko.