Bizkaiko Lurralde Historikoan sortutako Hiri Hondakinen Behatoki Iraunkorra txostenean, Aldundiak dio “benetako birziklapen-indize osoa” %67,7koa izan dela 2014an. Hau da, 2013an baino 5,2 puntu gehiago.

Ekologistak Martxaneko kideek adierazi dute zenbaketa modu egokian eginda indize hori ez dela inondik inora %67,7ra iristen.

EHUko irakasleak egindako txostenean irakur daitekeenez, aldaketa nabarmena dago 2014ko txostenean, 2013koarekin alderatuta. Labur esanda, Zabalgarbi errauskailuko tximinietatik isurtzen diren hondakin erraustuak ekuaziotik kanpo utzi dituzte. Hala lortu dute  2013ko txostenean %49,5eko birziklatze-indizea zena %62,5era igotzea (2013ko datuak), eta %43,9koa, berriz, %67,7raino handitzea (2014koak). Bestalde, %43,9ko datua ere handiegitzat jotzen du Buenok; benetakoa 38,5ekoa besterik ez da, haren kalkuluen arabera.

“Konponketa arbitrarioa”

Metodologia berria gogor kritikatu du Gorka Buenok: “‘Konponketa’ arbitrarioa da, ez du justifikaziorik europar metodologian”. Buenoren esanetan, Zabalgarbik barreiatzen dituen errautsak existitzen ez direla suposatzearen parekoa da zenbaketa egiteko modu hori: “Ez dira sortzen, ez eta tratatzen ere, eta, hortaz, ez dute ingurumen-inpakturik. Jakin badakigu hori faltsua dela”.

Bestalde, gogorarazi dute Aldundiak balorizazio energetikotzat jotzen duena ez dela beti hala. 2013an, Zabalgarbik hondakinak erre bai, baina 132 egunetan ez zuen elektrizitaterik sortu. “Deigarria da”, dio Gorka Buenoren txostenak, “2014ko Behatokiak 2013an erraustutako hondakin guztiak balorizatutakotzat jo izana (…). Zenbatespen anomalo horrek ezbaian jartzen ditu 2014ko datuak”.

Hondakin organikoaz den bezainbatean, Ekologistak Martxanek azpimarratu du 2016ko helburuak betetzeko, konpostatutakoaren kopurua %790 handitu beharko dela, eta Aldundiari eskatu dio hori nola lortuko duen argitzeko.