Orain dela egun batzuk Bilboko Irria kultur jardunaldiak antolatzeko beharrezkoak ziren bitartekoak lapurtu zizkietela salatu zuten Bilboko Konpartsek. Ez ziren lapurreta materialez ari, baizik eta hilabete luzetan udala debekatzen joan den ekitaldiez: "Bilbotarroi lapurtu digutena herritik herriarentzat segurtasunez antolatutako ekitaldi xumeak izan dira, konpartsoi, berriz, lapurtu digutena ez da ezer materiala izan, baizik eta konfiantza eta elkarlana…". Izan ere, apiriletik hona ari dira abuztuko azken asterako egitarau kultural herrikoi bat antolatu nahian, eta egiteko horretan udaleko agintari politikoen trabak izan dituztela salatu dute, hainbat ekitaldi debekatzeraino.

Prentsaurrekoan azaldu dutenez, udal teknikariek onespena emandako ekitaldiak ere atzera bota dizkiete, eta horretarako irizpideak arbitrarioak izan direla salatu dute. Adibide gisa jarri dute Miribillan eta San Mamesen milaka lagun elkartzea eta Bilborocken kontzertuak egitea baimendu dutela baina Bilboko Irriaren egitarauko tamaina txikiko ekitaldiak debekatu dituztela: "Badirudi konpartsak ez garela ez helduak, ez fidagarriak eta, egiten duguna egiten dugula, ez duela balio, zergatik eta soilik geuk antolatzen dugulako".

Ostegunean Juan Mari Aburto Bilboko alkateak egindako adierazpenei erantzunez Konpartsek argi utzi nahi izan dute Bilboko Irria ez dela jai egitaraua, eta ezta ez-jai egitaraua ere, ekitaldi-egitarau kulturala baizik. Aste Nagusia ospatu ez arren Bilbotarren aldartea hobetzeko ahalegina egin nahi zutela gogorarazi dute.

Bilboko Konpartsen webgunean ikus daiteke egitaraua osorik, debekatu dituzten ekitaldiak barne.