Gaztelania hutsean zegoen komuneko kartel bat euskaraz ere jartzeko proposatu zioten jatetxeko arduradunari, eta haren erantzuna izan zen "alemanez eta frantsesez ere" jarri beharko zukeela euskaraz ere jarri beharko balu. Euskara hizkuntza ofiziala dela esatean jazo zen erasoa, euskara gaztelaniaren dialektoa dela esatea. ARGIAk bezero horiekin hitz egin du.
Igande eguerdian, Bilboko Goiko Grill jatetxera bazkaltzera joan ziren Orhi Xabier eta bere familia. Bazkaria "ondo" joan zela kontatu dio ARGIAri Orhi Xabierrek, eta amaieran gertatu zela euskaldunen aurkako erasoa, bere aita komunera joan zenean. Gizonezkoen eta emakumezkoen komunak gaztelera hutsean bereizten ditu Goiko Grill jatetxeak –ellas eta ellos formula darabil–, eta bezeroa jatetxeko arduradunari zuzendu zitzaion euskaraz ere jarri zezatela eskatzera. Haren erantzuna, Orhi Xabierren iritziz "tonu nahiko mespretxagarrian", honakoa izan zen: "Euskaraz jarri behar badut, alemanez, frantsesez... ere jarri beharko dut".
Orduan, euskara, gaztelerarekin batera, hizkuntza ofiziala dela gogorarazi zioten jatetxeko arduradunari, eta Espainiako Konstituzioan horixe bera jasota dagoela. Itxura guztien arabera, "gehiago asaldatu" zuen iruzkin hark, eta "euskara gazteleraren dialekto bat" dela esan zuen. Orhi Xabierrek kontatu du "bigarren mailako herritar" sentitu zela. Irtetean, "agur" eta "hasta luego", bakoitzak berearekin segitu zuen.