EAEko unibertsitatez kanpoko hezkuntza publikoko 30.000 langile baino gehiago daude grebara deituta: irakasleak, Haurreskolak Partzuergoko hezitzaile eta kudeaketako langileak, eskoletako heziketa bereziko hezitzaileak eta hezkuntza saileko sukaldari eta garbitzaileak.

Gasteizko goizeko manifestazioan milaka lagun gerturatu direla diote LAB, STEILAS eta ELA sindikatu deitzaileek. Arratsaldeko 18:00etan ere mobilizazioak izango dira, Bilbo, Donostia eta Gasteizen.

Azaroaren 30ean egin zuten lehen greba eguna, eta haren ildo berean, “Hezkuntza Lege aurreproiektu honi ez” esan dute ozenki. “Hezkuntza Legean eta hezkuntza sistemaren aldaketetan eragin nahi dugula eta balizko hezkuntza legerik izango bada langileokin eraikitakoa izango dela” adierazi dute sindikatuek, Eusko Legebiltzarraren aurrean.

“Publikoa, euskalduna eta propioa izango den hezkuntza sistema bat helburu izanik, mobilizatzen jarraituko dugu, hezkuntza sistemak beharrezko dituen aldaketak bultzatzeko. Egungo sistema betikotzeko lege, dekretu edo aginduak ez ditugu behar, eredu duala gainditze bidean jarri behar da, eta langileon lan baldintzak eta lanpostuak aintzat hartu", gehitu dute.

Aldarrikapenak

Hamar aldarrikapenetan laburtu dituzte eskaerak sindikatuek: publikoa ardatz izatea; segregazioari aurre egin eta gizarte kohesioa bermatzea; publifikazio-marko eta araudi orokor eta adostua ezartzea; hezkuntza lege propioa izatea; inbertsio eta baliabide nahikoa izatea; euskara erdigunean jartzea; betebehar eta kontrol mekanismo zehatzak finkatzea; hezkuntza sistema osatzen duten langile guztien enplegua eta lan baldintza egokiak bermatzea; merkatuen interesen gidaritzatik eta enpresa pribatuen negozio esparrutik at egotea; eta hezkuntza lege parte-hartzailea izatea.

Aurreproiektutik legera, zer espero dezakegu?

Hain justu, aste honetan heldu diogu gaiari ARGIA astekarian, eta lege aurreproiektutik azken bertsiora egon daitezkeen aldaketen nondik norakoak eta gakoak laburbildu ditugu, honako erreportajean.