1

Euskaldunok oinarriz

garenez naparrak,

gaur harro erakutsi

ditugu paparrak,

aurpegi bakoitzean

diz-diz irriparrak,

denok busti baikaitu

bertsoen aparrak.

 

2

Gure ama-hizkuntzak

jaio zen sehaskan

garden erakutsi du

zer bertute dauzkan,

hainbeste bertso bikain

jaulkiaz erreskan,

nola ase gaituen

jaso dugun bazkan!

 

3

Bertsoari loturik

bihotz eta buru,

labur egin zaizkigu

zazpi ordu inguru.

Ze giro berezia!

Ze jende kopuru!

Holakoetan lur hau

bihurtzen da zeru.

 

4

Kiroldegi hau zen gaur

hitzen jolasleku,

guretzat bihurtua

tristuren debeku,

nola ez dugun beti

hori gure esku,

horregatik gaude gu

hain “zorioneku”.

 

5

Nahiz maiz kezkatzen garen

herri txiki izanaz,

bertsoa hazten doa

indarrez ta famaz.

Zer den zabal dezagun

ozenki esanaz:

herriaren ahots ta

hizkuntzaren arnas.

 

6

Bertsolaria argi

ta herria adi,

tartean ahantz ezina

den hainbat esaldi.

Giro hortan bertsoa

erne zen aspaldi,

kimu-berritu dena

gizaldiz gizaldi.

 

7

Irautea zen lehengo

izarren enkargu,

gaur elkarte handi bat

dugu horren kargu,

eta bertsolaritza

goi mailan daukagu.

Munduko herri askoren

inbidi gara gu.

 

8

Zortzion lana zenez

zeru zeremoni,

denok zoriontzeko

irrikaz nago ni.

Batez ere mirari

egile den honi:

Musu estu-estu bat

“Santa Maialeni”.