Eskoletako jangeletan “sukaldeak jartzea” eta “sasoiko eta bertoko produktuak kontsumitzea” aldarrikatzen dute, hots, “jangela eredu berria”. "Blokatutako" webguneetan beren aldarrikapenak biltzen dituen bideoa eskegi dute.
Berton Bertokoa taldeak hainbat catering enpresa handiren webguneak erabilgaitz utzi dituela simulatu du, hala nola, Eurest, Grupogasca, Gastronomia Baska, Tamar, Cocina Central Goñi eta Cocina Central Magui konpainienak. Enpresa horien izenean webguneak sortu dituzte .eus domeinuan, eta blokatuta zeudela simulatu. "Blokatutako" webguneetan euren aldarrikapenak azaltzen dituen bideoa eskegi dute orrialdeetan.
“Jangela eredu berria” eskatzen dute ikastetxeetarako, “umeentzat osasuntsua” izango dena, “bertoko eta sasoiko produktuak” erabiliko dituena. Horrez gain, ereduak baserritar, arrantzale eta hezitzaileen "lan-baldintza justuak bermatzea” ere beharrezkotzat jo dute. Kalitatezko hezkuntza eta elikadura “oinarrizko eskubideak” direla ohartarazi dute, agintari publikoek bermatu beharrekoak. Eskoletan elikadura “negozio” bihurtu izana deitoratzen dute ordea Berton Bertokoa taldeko kideek.
Agintari publikoen “ekintza eza” ikusirik, ekintza hau burutu dute ohartarazteko eskoletako elikadura “bahitua dutenak bahitu” egin dituztela. Eskatu dute eskola publikoetako jangeletan “bertoko baserritar eta arrantzaleen produktu freskoak prestatzeko aukera” eta “eskoletan jangelak jartzea”.