Environmental Working Group-ek gosaritarako produktuen artean aurkitu daitezkeen zerealen artetik 45 ikertu ditu, denak ere herbizidak darabiltzaten zelaietatik eratorriak. Iragan abuztuaren 15ean jakitera eman zuenez, ikertutako produktuetatik 43tan aurkitu dute glifosatoa, horietatik 31tan oso maila altuan. Gosaritarako zerealak haurrei zuzendurik saltzen diren heinean, txikienek minbizia pairatzeko arriskua areagotu dezakete.

Izan ere, datuok glisofatoaren segurtasuna eztabaidagai den momentuan kaleratu dira. Erregulatzaile estatubatuarrek herbizidak ziurrenik minbizirik eragiten ez duela defendatzen duten bitartean, Munduko Osasun Erakundeak minbizi eragilea izan litekela dio. Azken erakunde honen Ikerketaren Nazioarteko Zentroak glifosatoa kantzerigeno posible deklaratu zuen 2015ean.

Monsantok garatu zuen glifosatoa orain 40 urte, eta mundu mailako herbizidarik ezagunenean bilakatu zen. Datu ofizialen arabera, 2011tik hona 250 milioi Libra glifosato fumigatzen dira urtero AEBetan. Herbizida honen kontzentrazio maila altuena garian, garagarrean edo oloan aurkitu daiteke.

Ikerketaren bitartez frogatu ahal izan dutenaren arabera, olo ekologikoarekin landutako 16 produktutik 5ek ere glifosatoa zeukaten. Nekazaritza ekologikotik eratorritako produktuen glifosato maila kontsumitzailearen osasuna arriskuan jartzeko bestekoa izan ez arren, hauek ez lukete kimikorik izan behar.