Positibotasun tasa, %7,9koa izan da asteburuan EAEn eta Nafarroan ere, azken bi hilabeteetan zenbatu diren datu baxuenak zenbatu dituzte, %5,8ko positibo-tasarekin. Ipar Euskal Herria biltzen duen departamenduan ere %14,4koa da datu hau, azken informazio ofizialen arabera –azaroaren 13an–, hau ere aurrekoetan baino doi bat apalagoa.
Behera egin dute COVID-19aren gaitzak kutsatutako kasu postiboek orokorki Euskal Herri guztian. EAEn aurkitutako positiboen kopurua ttipitu da asteburuan: Araban 73, bezperan baino 43 gutxiago, Bizkaian 407, aurreko egunean baino 46 gutxiago eta, Gipuzkoan 307, bezperan baino 124 gutxiago. Nafarroan azaroaren 16an 2.363 PCR eta antigeno proba egin zituzten eta 136 positibo atzeman zituzten.
Ipar Euskal Herria biltzen duen departamenduan ere positibo tasa ttipituz doa. Hori horrela, positibo-tasak %7,8koa da EAEn, %5,8koa Nafarroan eta %14,4koa Ipar Euskal Herria biltzen duen departamenduan.
Egoera "larria"
Ospitaleratzeen kopurua kontutan harturik, "egoera larria" dela argi utzi du Ignacio Garitano Eusko Jaurlaritzaren Osasun Saileko eta Osakidetzako Zaintza eta Kontrol programen koordinatzailea. 145 lagun daude EAEko zaintza intentsiboen unitateetan eta 55 lagun gehiago ospitaleratu zituzten asteburuan. Ipar Euskal Herria biltzen duen departamenduan ere 411 dira ospitaleratuak eta hauetan 22 dira zaintza intentsiboen unitateetan. 110 hildako eragin ditu koronabirusak Ipar Euskal Herria biltzen duen departamenduan. Nafarroan, 58 pertsona daude zainketa intentsiboetako unitatean (ZIU), eta 331 gaixo daude ospitaleetan.
Datuek beherako tendentzia duten arren, oraindik zifra altuak jasotzen ari garela ohartazi nahi izan du Eusko Jaurlaritzak. Jasaten dugun egoera larria dela kontutan harturik, hiru lurraldeetan “egonkortze fasearen bidean” izanda ere, zentzuz jarraitzea eskatu du, "egoerak, berriz, okerrera egin ez dezan".
Nafarroako Gobernuak mugikortasunaren murrizketak abenduaren 18ra arte indarrean izango dituela jakinazi du. Lapurdi, Nafarroa Beherea eta Zuberoan ere aurrera doa konfinamendua, eta Frantziako Gobernukoek egindako hainbat adierazpenei segi, baliteke abenduan ere segitzea.
Eustaten azken datuak
Aurreko urteko datuekin alderatuta, % 19,5 egin du gora heriotzen kopuruak 2020ko bigarren hiruhilekoan EAEn, Euskal Estatistika Erakundeak argitaratutako datuen arabera. COVID-19k eragindako heriotzen ondorioz gertatutako igoera izan dela adierazi du institutuak. Izan ere, heriotza guztien %20 COVID-19aren gaitzak kutsatutako gaixoak izan ziren.
Pfizer, Moderna eta beste
Pfizerrena baino eraginkorragoa eta hotzean kontserbatzeko eta garraiorako errazagoa izango den txertoa iragarri du AEBetako Moderna konpainia farmazeutikoak. Astebete behar izan du Modernak, Pfizer konpainiak COVID-19ren aurkako txertoaren atariko lehen emaitzen iragarpenari erantzuteko. Joan den astean Pfizerrek txertoak % 90eko eraginkortasuna zuela esan bazuen ere, Modernak % 94,5era igo du apustua astelehen honetan. Modernarenaz gain, beste bederatzi txerto daude garapenaren hirugarren fasean.
Bestealde, Ignacio Garitano Osakidetzako Zaintza eta Kontrol Programaren koordinatzaileak, "zuhurtziaren alde" egin du farmazialariak iragartzen ari diren txerto berrien aurrean. Izan ere, ohartazi du ez direla epe laburrean hartuko ditugun txertoak eta beraz, babes neurriekin jarraitu beharko dugula. "Zuhurtzia" eskatu du ere OME Osasunaren Mundu Erakundeak: iragarpenak "pozgarriak" badira ere, immunizazioaz "hainbat zalantza" daudela esan zuen.