argia.eus
INPRIMATU
Baserrien zurezko egiturak berritzen ikasteko programa martxan jarri dute mugaz bi aldeetako erakundeek

  • "Baserriberri" du izena programak eta langabezian diren Euskal Herri osoko 12 ikasleri zurgintza formazioa emango die, erortzear diren baserriak berritzen ikas dezaten.

ARGIA @argia 2024ko martxoaren 25a
Baserriberri proiektuaren aurkezpenean, zaharberrituko duten Tomasenea baserria bisitatu dute mugaz bi aldeetako ordezkariek. Argazkia: Haizpea Abrisketa / kazeta.eus

Urdazubin aurkeztu dute Baserriberri programa, martxoaren 22an, mugaz bi aldeetako erakundeetako ordezkariek. Ekimen horrek baserriak eta zurezko beste eraikin batzuk birgaitzeko ofizioa irakastea du ardatz. 1.778.447 euroko aurrekontua du, eta horietatik 1.155.989 euro Eskualde Garapeneko Europako Funtsetik (EGEF) datoz.

Egurrezko lan-tekniketan trebatzea da proiektuaren helburua, baserri zaharrak eta zurezko beste egitura batzuk berritu ahal izateko. Langabeei zuzenduta dago eskaintza, lan munduan sartzeko baliagarri izan dakien eta zurezko eraikuntzaren sektorean belaunaldien arteko erreleboa sustatzeko.

Formazioak saio teorikoak eta praktikoak izango ditu. Irailetik aurrera hasiko dituzte saioak 12 ikaslek (launa Nafarroatik, EAEtik eta Iparraldetik) eta 2026ko ekainean bukatuko da.

Ezkerretik eskuinera, Isabel Elizalde (Peio Martikorena Fundazioko zuzendaria), Jean René Iturbide (Compagnons du Tour de France Federazioko zuzendaria), Mathieu Bergè (Akitania eskualdeko kontseilaria), Ana Ollo (Nafarroako Gobernuko lehendakariordea), Marie Lasserre (Mission Locale Pays Basque elkarteko presidentea), Fermín Martikorena (Peio Martikorena Fundazioko presidentea) eta Jorge Arevalo (Eusko Jaurlaritzako Lanbide Heziketako sailburuordea). Argazkia: Nafarroako Gobernua.
Parte hartzen duten erakundeak

Peio Martikorena Fundazioa, Nafarroako Gobernua (Lanbide Heziketako, Digitalizazioko eta Hezkuntza Zerbitzuetako Zuzendaritza Nagusia), Eusko Jaurlaritza (Lanbide Heziketako Sailburuordetza), Oarsoaldea Garapen Agentzia, Pirinio Atlantikoetako Lagunen Federazioa eta Pirinio Atlantikoetako Euskal Herriko Misioa.