Kalean ezin saldu, berez gogorrak dituzten baldintzak okerragoak bilakatu ditu krisi honek manteroentzat. Euskal Herrian bezala, baita Bartzelonan ere. Hango manteroen borroka ezaguna da eta oraingoan ere, ez dute bi aldiz pentsatu: Top Manta markako tailerrean maskarak, batak eta txano kirurgikoak josteari ekin diote, ospitaleak hornitzea helburu.
“Koronabirusaren krisia latz ordainduko dugu kale-salatzaileok. Mantarekin lan egiten dugunak lanik gabe geratu gara eta askok arazoak dituzte alokairua ordaintzeko edota oinarrizko elikagaiak lortzeko”. Gauzak horrela, gehien behar dutenei laguntzeko elikagai banku solidarioa sortu du Bartzelonako manteroen sindikatuak, premiazko produktuak jaso eta kaltetuak diren 154 familiak laguntzeko. Elikagaiak eman edo diru ekarpena egin nahi duenarentzat, moduak jarri dituzte.
Horrez gain, esan bezala, eta uneotan premia handiena ospitaleetan dela jakinik, hara begira jarri dituzte beren baliabideak. Mediku, erizain eta laguntzaileak lanean babes nahikoarekin aritu ahal izateko josten ari dira manteroak, eta horretarako, beharrezkoak diren segurtasun neurriak hartu dituzte tailerrean.
