Burbuilen eta finantza-mozkinen garaiak oso urrun geratu dira. Burtsek ez zuten inoiz Lehman Brothersen amiltzea gainditu. Merkatuekiko konfiantza Mario Draghik banatutako diru merkearen oinarriari esker mantentzen da. Baina badirudi finantza etikoen sektorean, irizpide sozial eta ekologikoetan oinarritzen diren bankuetan, egoera bestelakoa dela.

Hori izan liteke, hain zuzen ere, Europako finantza etiko eta iraunkorrei buruzko bigarren txostenaren datuei erreparatzean ateratzen den ideia nagusia. Espainiako Finanzas Éticas fundazioaren eta Italiako Finanza Etica fundazioen lankidetzari esker idatziriko txostenak dira, biak ere Banca Popolare Etica sareko partaideak. Europako Parlamentuan otsailaren 6an aurkeztu zen txosten horretan, Europan dauden 23 banku etikoen hazkunde edo errentagarritasun zifrak alderatzen dira, Europan egoitza duten munduko 15 banku garrantzitsuenekin, azken hamar urteetan.

Banku etikoen eta jasangarrien zerrenda honek, besteak beste, La Caixa de Pollença, Italiako Fiare edo Triodos holandarra biltzen dituenak, azken hamar urteetan banku tradizionalek baino hiru aldiz errendimendu handiagoak lortu ditu. Txostenaren arabera, finantza-krisia hasi zenetik urteko batez besteko errentagarritasuna %3,98koa da, eta gainerako bankuena berriz %1,23koa.

Era berean, finantza etikoen bankuek "benetako ekonomiaren garapenerako kredituak ematen dituzte, eta gizarte eta ingurumen irizpideak oinarri hartuta inbertitzen dute", txostenean adierazi dutenez, eta krisiaren aurrean bereziki erresistenteak direla erakutsi dute.

Aktiboen, gordailuen, maileguen eta banku etikoen eta iraunkorren ondare garbiak ere, urteko %10 inguruko hazkunde-zifrak ematen ditu. Finantza-sektore orokorren portzentajeetatik asko bereizten diren datuak dira. Adibidez, 2007tik 2017ra, aktiboek, eta, beraz, banku etikoen inbertsio, kreditu eta likideziak, batez beste, %9,66 hazi dira urtean, ohiko banketxeen %-1aren aurrean.

Gordailuei dagokienez, bezeroen konfiantza eta horrelako erakundeetara aldatzeko joera erakusten duen datua alegia, 2007 eta 2017 artean banku etikoek %11ko batez besteko hazkundea izan dute. Ohiko bankuek berriz, %2koa.

Banku izaten jarraitzen duten bankuak

Finantza-krisia piztu ondoren ikusi zen argi eta garbi finantza-industriaren negozioaren zati handi bat finantza-produktu konplexuekin edo bestelako inbertsio-tresnekin espekulatzean oinarritzen zela. Higiezinen alorreko negozioaren amiltzearen ondorioz, banketxeek neurriz kanpo handitu dituzte komisioak, beren etekinaren zati handi bat modu horretan ateratzeko.

Banku sistemaren funtzio primarioa, biztanleriaren sektore baten aurrezkia beste sektore baterantz bideratzea, hein handi batean galdu da. Baina txostenaren arabera, finantza etikoek ekonomia errealaren alde egiten dute, mailegu bidez, enpresa produktibo eta espekulazio gabekoei maileguak emanez. 2017an, banku etikoen eta iraunkorren jarduera osoaren %77a zen kredituen emakida. Ohiko bankuetan, jarduera hau %40,52 baino ez da. Txosten horretan aztertu diren hamar urte hauetan, banku etikoek %11ko batez besteko maileguak izan dituzte urtean, eta banku tradizionalek, berriz, %1.

Funts arduratsuak

Txostenaren bigarren zatian, sozialki arduratsuak diren funtsen zenbakiak aztertzen dira: burtsan kotizatzen duten enpresen eta zorretan kotizatzen duten enpresen eginbeharretan, edo zor subiranoen tituluetan, ingurumen eta gizarte irizpide jakin batzuetan oinarrituta. Europan, best in class fondo etikoetan inbertitutako ondarea, zeinak biltzen dituen industria bakoitzeko onenak eta irizpide zorrotzenak dituztenak, batez beste %9 igo dira urtean, 600.000 milioi euroak urratuz.

Albiste hau El Saltok argitaratu du eta CC-by-sa lizentziari esker ekarri dugu ARGIAra.