2016ko abenduan ETAren armak eduki eta garraiatzea leporatzen diete Jean Noel Etxeberri Txetx eta Beatrice Molle bakegileei. Foro sozialeko kide izandako zenbait sindikatu eta eragilek bakegileek ETAren armagabetzearen auzian egindako lana eskertu eta babestu dute, eta Etxeberri eta Molle errugabetzeko eskatu dute. Apirilaren 3an elkarretaratzeak eginen dituzte zazpi hiriburuetan, Errugabetzea, Euskal Herrian aro berri bat behin betiko irekitzeko lelopean.

Agus Hernan giza eskubideen aldeko ekintzaileak eta Begoña Atxa Sare Herritarreko ordezkariak aurkeztu dute agerraldia, eta ELAko idazkari nagusi Mitxel Lakuntzak eta LABeko koordinatzaile orokor Igor Arroyok ere hartu dute hitza. Horrez gain, Bilgune Feminista, Etxerat, Egiari Zor, Gernika Batzordea eta beste hainbat eragile eta sindikatu izan dira bertan. Gogora ekarri dute martxoaren 16an, Luhuson (Lapurdi) egindako agerraldia. Bertan, 200 lagun elkartu ziren bakegileei babesa helarazteko eta errugabetzea eskatzeko. 

Agerraldian nabarmendu dutenez, euskal gizartearen inplikazioa “beharrezkoa” izan da eta izango da gatazka armatuaren konponbiderako beharrezkoak diren eginbeharretan. Horrez gain, gogorarazi dute biktima guztien aitortzan, memorian eta egiarako eskubidean zein presoen eremuan ere oraindik egiteko gauzak daudela: “Ezin dugu ahaztu euskal presoei oraindik ere aplikatzen zaien salbuespenezko espetxe-politika gainditzeke dugula".

Oztopoei aurre eginez

Lakuntzak nabarmendu du “bakea” eta “bizikidetza” sustatzeko hautua egin zutela Parisen epaituko dituztenak, eta “zentzugabea” dela hori epaitzea. Horrez gain, Mixel Berhokoirigoin, Mixel Bergouignan eta Michel Tubiana omendu dituzte. Operazio hartan parte hartzeagatik atxilotua zituzten eta epaiketa aurretik zendu diren bakegileak.

Bide beretik jo du Arroyok, eta esan du Euskal Herrian bakea lortzeko prozesua “ezohikoa” dela: “Alde batetik, bi estatuek jarritako oztopo politiko, juridiko eta politikoak pairatu ditugu. Bestetik, ezker abertzaleak zein beste gizarte eragileek eta sindikatuek oztopoei aurre egiteko egindako lana dago”. Gaineratu du gaur egun ere oztopoak jartzen dituztela eta epaiketa horren adibidea dela.