Irailaren 20tik 28ra egingo da Zinemaldia. Igande honetan irekiko da lehen hiru egunetako emanaldietarako sarreren leihatila.
Indartsu dator aurtengo Zinemaldia. Hasteko, Sail Ofizialaren inaugurazio galan emango dute Audrey Diwanen lan berria, izen bereko nobelan oinarritutako Emmanuelle; aurreko lanarekin, Diwan zuzendariak Veneziako Urrezko Lehoia irabazita zuen. Horrez gain, Francis Ford eta Gia Coppolaren azken lanak Donostian izango dira, baita Joshua Oppenheimer ere, eta The End bere azken lanak itxura ona du; eta, gehiago ere: Jacques Audiard eta Sean Baker, besteak beste.
Cate Blanchett eta Pedro Almodóvarrek jasoko dituzte aurtengo bi Donostia Sariak, eta Javier Bardem ere Donostian izango da, iazko garaikurra jasotzen. Beste saridun aurreratuetako bat Elena Irureta aktore zumaiarra izango da, euskal ekoizpenen aterpe den Zinemira saria jasoko baitu.
Zinemira sailak bederatzi lan proiektatuko ditu aurten, eta horietatik hiru obra euskara hutsean izango dira: Pello Gutierrezen Erreplika, Naia Lakaren Zortzitik infinitura eta Amaia Merino eta Ander Iriarteren Indarkeriaren oi(h)artzunak. Hiru lan berri horietan entzungo da euskara, baina baita Zuzendari Berriak sailean lehiatuko den David Pérezen Azken erromantikoak-en ere.
Euskal Herriko ekoizpenak, baina, dezente gehiago dira: esaterako, Sail Ofizialean lehiatuko du Iciar Bollainen Soy Nevenka filmak. Galiziako udalerri bateko zinegotzi Nevenka Fernandezek jasandako sexu jazarpenaren inguruko gertakari errealak –fikzio bihurtuak– kontatzen ditu Bollainen filmak; kasu entzutetsua izan zen Espainian, 2000. urtean gertatu zena. Horrez gain, Sail Ofizialean proiektatuko da Alauda Ruiz de Azuaren Querer telesaila, Movistarrena, lehiatik kanpo. Horrek ere indarkeria matxista du gai nagusi: 30 urte ezkonduta egon ondoren, emakume batek senarra salatuko du etengabe bortxatzeagatik, eta horrek familian zer eragiten duen kontatzen du.
Bestalde, Made in Spain sailean lehiatuko den Nina filma, Andrea Jaurrieta zuzendariarena. Patricia López Arnaizek gorpuztuko du protagonista, zeina jaioterrira itzuliko den iraganeko pertsonen kontra mendeku hartzeko.
Nabarmentzekoetan, azkenik, Moriartitarren azken lana: Marco. Veneziatik itzuli berri, sona irabazita, orain lehiatik kanpo egongo den arren, Donostiako Zinemaldiko Perlak saila itxiko du Enric Marcoren istorio iruzurtia kontatzen duen filmak. Aste honetako ARGIAn kontatu ditugu filmaren xehetasunak, eta Jon Garaño zuzendaria elkarrizketatu dugu.
Sarrerak: igandetik aurrera
Zinemaldian ohikoa den moduan, egunka banatuta hartu beharko dira sarrerak. Hau da, igande honetan, 9:00etatik aurrera, Zinemaldiko lehen hiru egunetako emanaldien sarrerak erosi ahalko dira; irailak 20, 21 eta 22koak. Astelehen goizean, irailak 23, 24 eta 25 egunetakoak. Eta astearte goizean, azkenik, irailak 26, 27 eta 28koak. Zinemaldiko webgunean eskuragai dira.
Behin Zinemaldia abiatuta, libre geratu diren sarrera oro erosi ahalko dira.
Programazioa
Ikusi hemen programazioa, sailez sail.
Ikusi hemen programazioa, egunez egun.