Azaroaren 4an manifestazioa egingo da Bilbon euskararen normalizazioaren aurkako oldarraldia salatzeko. Ostegunean, euskal sindikatu nagusiak eta lan munduko hainbat eragile bildu dira prentsaurrekoan horrekin bat egiteko. Horrez gain, langileen hizkuntza-eskubideen eta lan-eskubideen aldeko aldarriaren argudioak aurkeztu dituzte.

Agerraldian parte hartu dute ELA, LAB, ESK, CGT/LKN, STEILAS, HIRU, EHNE, Etxalde, Lanartea, OlatuKoop eta EHko Pentsiodunen Mugimenduko kideek. Halaber, Kontseiluko idazkari nagusi Idurre Eskisabel arduratu da adierazpen bateratua irakurtzeaz.

“Geroz eta agerikoagoa da euskararen biziberritze eta normalizazio prozesuak ezinbestekoa duela lan-munduaren euskalduntzean jauzia egitea”, adierazi dute. Eskisabelek azpimarratu du hezkuntza ezinbesteko oinarri bat den arren, ez dela nahikoa: “Zertarako balio du inoizko gazte belaunaldi euskaldunena izateak, lan-mundua erabat erdalduna denean?”.

Hizkuntza gutxitu baten “biziberritze eta normalizazio prozesuan” eremu sozioekonomikoa “ezinbestekotzat” jo du Eskisabelek. Kontseiluak aldarrikatu du herritar-erabiltzaile modura zerbitzua norbere hizkuntzan jasotzeko eskubidea: “Lan-jarduera eta lanbidea euskaraz garatzeko eta lan-harremanak euskaraz burutzeko eskubidea defendatzen dugu”. Horretarako, “hizkuntza politika eraginkorrak” behar direla azpimarratu dute.

Euskararen normalizazio prozesua “trabatu” eta egindako bidean “atzerapausoak” eragiteko “olatu erreakzionarioa” ere aipatu dute: “Ikusi besterik ez dago Espainiako Auzitegi Konstituzionalaren azken hitza, non estatu-egiturek argi utzi nahi izan duten hemen hizkuntza-politikei dagokienez nork duen azken hitza”.

Azaroak 4, manifestazio eguna

Horren aurrean, mobilizazio sozialerako deia egin dute: “Hizkuntza-berdintasunean, justizia sozialean eta bizikidetzan sinesten duten herritar eta eragile guztiei datorren azaroaren 4an balio horien denen defentsan Bilboko Euskaldunatik egingo den manifestazioan parte hartzeko deia egiten diegu”.