Ordutik hona, beti ezagutu dogun moduan, astelehenero merkatua daukagu: ortuari, esneki, fruta, erropa,… eskualdeko eta kanpoko hainbat saltzaile, bakotxa beraren postuan, euri zein eguzki, hego haize zein ipar haize. Denboraren harea inoiz agortuko ez balitz legez.

Badagoz denboran izoztuta geratu jakuzan momentuak be. 1937ko apirilaren 26ko bazkaloste ikaragarria urtero gogoratzen dogu, isiltasunean, geldi. Zelan ahaztu merkatu egunean bota euskuezan gorroto bonbak, zelan ez gogoratu merkatu egunean isildu ebezan ametsak.

2014ko abenduaren 15 goizean be denboraren orratzak gelditu ziren. Zelan ahaztu merkatu egunean ertzainek astindu ebezan gorroto porrak, zelan ez gogoratu isiltzen ahalegindu ziran ilusioa. Zelan ahaztu alaba bahitu gura eutsien aita jipoituaren aurpegia, zelan ahaztu 37ko bonbaketatik bizirik urten eban amumaren beso apurtua.

Bakearen eta kulturaren hiria izendatu eben Gernika. Jone bahitu aurreko asteetan izendapen horren benetako irudia ikusi gendun. Injustizia eta astakeria haren aurrean, bakearen kontrako eraso haren aurrean aterpe laranja eraiki gendun ehundaka lagunek. Mendeku zaleen aurreko horma, porra luzagarrien kontrako aterki zabalduak.

Zenbat batzar, kartel eta kafe. Zenbat eztabaida eta adostasun. Zenbat lan eta ilusio. Zenbat Jone. 2014ko abenduaren 13 eta 14an Gernika-Lumon eraiki gendun  territorio librean askatu genduzan danak. Gazte ta heldu, bertoko ta bertako, sukaldari ta musikari, bertsolari ta mitinlari, arnas eta taupada. Poztekoa eta zoriontzekoa.

Eta guztion artean zeu, Jone. Urduri, baina beti bezain irribarretsu. Nekatuta, baina beti bezain gartsu. Aurreko asteetan bideo bidez agertu zinena, asteburuan ahizpa, guraso, lagun eta ezezagun artean agertu zinen. Galeanoren “un mar de fueguitos” poemako su bizia, ikusi orduko beste guztiok piztu genduan sua. Biba zu!

Orain Errigoitiko Marije zigortu gura dabe beste 35egaz batera, herriko tabernak lapurtu gura dauskuez…  epaiketa eta ebazpen politikoek etenik ez! Zalantza barik iazko gazte energia amatatzea ez dabe lortu. Gerrazaleen horma sendo dago.

Urtebete eroan zinduezana.  Urtebete Gernika-Lumoko aterpe laranja zabaldu genduana. Eta ez do gutxi. Ez daukagu ixteko asmorik. Behar daben Jone danantzako zabalik dago.

Larter arte Jone. Maite zaitugu.