Ategorrietako Sarraskian gertatutakoa oroituko du Donostiako Kontseilu Sozialistak, gertakariaren urteurrenean. Maiatzaren 27an 92 urte beteko dira Guardia Zibilak zazpi grebalari hil zituenetik. Egun horretarako ekitaldi politikoa antolatu du Kontseiluak, 12:00etan, Trintxerpeko plazan. Astebete lehenago, maiatzaren 19an, mahai-ingurua egingo dute Trintxerpeko alkateordetzan.

1931ko maiatzaren 27an, II. Errepublika garaian, greban zeuden Pasaiako portuko langileek manifestazioa egin zuten Donostia alderantz. Ategorrietako erlojuaren parera heltzean, Guardia Zibilak tiro egin zuen eta zazpi manifestari hil eta hogeita hamahiru zauritu zituen.

1929ko krisiaren testuinguruko "proiektu politiko sozialdemokrataren porrotaren eta bere traizio historikoaren" adibidetzat jo du Kontseilu Sozialistak Ategorrietako Sarraskia. Haren hitzetan, "estatu kapitalistak langile mugimendu iraultzailearen aurka erabiltzen duen basakeriaren erakusgarria" da egun hartan gertatutakoa.

Memoria historikoaren erabileraz

Halaber, salatu dute Estatu aparatuek eta horien kudeatzaileek "haien irudia garbitzeko" erabili nahi dutela memoria historikoa: "Politika burgesak memoria historikoaz egiten duen erabilerari kontrajarriz, aurreko belaunaldietako langile borrokaren irakaspenak egungo adierazpen praktiko iraultzaileekin lotzeko ardura dugu".