Euskal Idazleen Elkarteak eta Euskal Pen Klubak Asel Luzarragaren kasua epaitegira eraman ahal izateko kanpaina abiatu dute. Kanpainaren helburua dirua batzea da, izan ere, elkarteek azaldu bezala, Aselen absoluzioa da prozedura judizialetik atera dezaketen ondorio “onargarri” bakarra.
Fito Rodriguez idazlea eta Asel Luzarraga bera izan dira kanpaina azaldu dutenak. Hamar urte eta gero, Amerika Arteko Giza Eskubideen Batzordeak Aselen kasua aurrera eramateko zantzuak ikusi dituztela azaldu dute, eta Txileko Estatuaren aurka jarritako salaketa onartu zaionez kanpaina aurrera ateratzea erabaki dute.
Asel Luzarraga idazle anarkista Txilen atxilotu zuten 2009an terrorismoa laguntzea eta gazteei ideia okerrak erakutsi nahi izatea leporatuta. “Muntaia lotsagabetzat” definitu dute ordukoa, Aseli egotzitako delituak ezeztatuz, eta berak egindako bakarra bere blogean maputxeen aldeko testuak idaztea izan zela argudiatuz.
Aselen etxean "bereak ez ziren armak" argudiotzat hartuta atxilotu zuten, eta Terrorismoaren aurkako legearen pean jarri. Bere abokatuak etxeko atxiloaldia izatea lortu zuen, eta epaia eman zutenean jada beteak zituen atxilo eman beharreko egun horiek. Ordutik Txiletik kanpo bizi da, eta Txileko Estatuak hasieratik hori nahi zuela adierazi du.
Orain, bere kasua aurrera eramateko aukera bat ikusi dute kanpaina abiatu duten bi elkarteek, eta kanpaina baliatu nahi dute epaiketarekin jarraitzeko. Horrez gain, Aselen historiari buruzko dokumental bat egiten dabiltzala ere jakinarazi nahi dute, eta gonbitea luzatu diete idazle eta artistei beren burua grabatu eta dokumentalean parte har dezaten.