Planteamendua ezin demokratikoagoa da: erroldatuta dauden guztiek izango dute aukera erreferendumaren galdera argiari baiezkoa edo ezezkoa emateko; hori bai hautatu egin beharko dute Espainiako Estatuak eskaintzen duen monarkia konstituzionalarekin eta autonomi estatutu kaxkarrarekin jarraitu nahi duten ala Kataluniako estatu propioa nahi duten, Kataluniako errepublika Espainiatik ez-dependentea, eta honekin katalanago izateko esperantzarik baduten, linguistikoki eta kulturalki, materialki eta espiritualki. Ai halako abagunean jarri izan bagintuzte gureek, bestaldera begiratu beharrez, Espainiako Gobernuko Barne ministroak esandakoa nola interpretatuko espekulazio hermeneutikoetan noragabetu beharrean!

Abagunea diozu –entzuten ari naiz–: ez dakizu Espainiako Gobernuak 1.500 funtzionario katalani eskutitza bidali diela esanez nagusiz ez daitezela tronpa, Madrilekoari zor diotela obedientzia eta ez Generalitateari, eta desobedientzia isunekin ordainaraziko dietela edota espediente zorrotzekin. Ez dakizu Cospedal andreak esan duela Espainiako gizon eta emakume armatuak batasun hautsezina bermatzeko daudela. Ez dakizu katalan independentisten aurkako eraso administratibo-judizialaren ondotik –Konstituzionala brankan dutela–, ekonomikoa eta militarra etorriko direla, Brunete mediatikoaren laguntza ikaragarriarekin.

Espainiar kontzientziatu gehienak ez dira demokratak, espainolak dira, eta totalitarioak politikoki ere euskaldun edo katalan edo galiziar izan nahi dugunon aurka egiteko, Estatuak dituen baliabide guztiak erabiltzearen aldekoak. Hori ez dugu inoiz ahaztu behar.

Politikari katalanak maila ematen ari direla esan dut. Orain ikusi behar dugu funtzionarioek maila ematen duten –justizia funtzionarioek bezala mossoek–, enpresaburu eta finantza-buruek maila ematen duten, eta halaber herritar kontzientziatuek eta ez hain kontzientziatuek ere. Zergatik ez dugu, bada, izango horiengan itxaropena, eta zergatik ez dugu, bada, pentsatuko politikari duinen duin izango direla!

Zer egin dezakete estatuko botere faktikoek? Zer ikusteko ote gaude? Konstituzionalaren betiereko erasoez gain, hautestontziak jartzea galaraziko ote dute?, jarritako hautestontziak kentzera guardia zibilak eta polizia nazionalak bidaliko ote dituzte? Mossoen eta polizia espainiarren arteko tirabirak ikusteko ote gaude? Ez diezaiegun ideiarik eman, ez daude horren eskasian eta.

Dagoeneko eskerrak eman beharrean gara katalanei, politikan gauzak garbi jartzeagatik, eta herritarrak politikoki espainol ala katalan izan nahi duten hautatzera behartzeagatik, hainbat aitzakia merke indarrik gabe utzirik: “Politikari guztiak berdinak dira, nik ez dut politikaz ezer jakin nahi”. Hau da, gure mendekotasun eta morrontzaren sasi-argudio eta aitzakia baino ez direnak funtsik gabe uzteagatik.

Hautatu beharra dute Katalunian, eta Kataluniako Errepublika askea sortzeko koiunturan murgiltzear dira. Besteak beste, inbidia sanoa ematen digute!