Ongi Etorri Errefuxiatuak plataformak deituta, Bilboko Portuaren politiken kontra protesta egiteko hainbat lagun bildu dira Getxoko gurutzontzien kaian, portuko Plan Estrategikoa aurkezten ari ziren bitartean. Armak esportatzea eta migratzaileei trabak jartzea salatu dute besteak beste.
Datozen bost urteetarako Bilboko Portuaren Plan Estrategikoa aurkeztu dute gurutzontzietarako terminal berrian, Getxon. Ekitaldian parte hartu dute, besteak beste, Asier Atutxa Portuko Agintaritzako presidenteak, José Llorca Estatuko Portuetako presidenteak eta Arantza Tapia EAEko Ekonomiaren Garapen eta Lehiakortasun sailburuak, Etorkizunarekin konprometituta lelopean.
Bitartean, protesta egin dute hainbat lagunek kanpoko aldean, Ongi Etorri Errefuxiatuak taldeak deituta. Esan dutenez, “Bilboko Portuaren etorkizun horretan eros-ahalmen handiko pertsonek baino ezingo dute portua erabili; turistak onartuko dira, baina ez migratzaileak; gure portutik armak aterako dira gatazkan dauden herrialdeetara”.
Zehazki, elkarretaratzean bildutakoek eskatu dute arma gehiagorik ez bidaltzea Saudi Arabiara. “Herrialde hori nabarmendu egiten da NBEren zerrenda tragikoan, hildako adingabe kopuru handiagatik”, salatu dute. Azken urtean lehergailuz betetako 300 edukiontzi baino gehiago atera dira Bilboko Portutik Saudi Arabiarantz.