UGT sindikatuak helegitea jarri zion 2021eko Arkautiko polizien akademiaren lan poltsari, euskarazko B2 maila exijitzen zuelako eta horrek "diskriminazioa eragiten" duelako. Gasteizko Administrazio Auzitegiak arrazoia eman zion irailean, eta orain eman du epai irmoa: udaltzainek ez dute euskarazko gutxiengo mailarik egiaztatu beharko.

Bi hilabete eman dizkio auzitegiak Arkautiko akademiari berriz ere onartzeko hizkuntza eskakizunagatik 2021eko lan poltsatik kanpo gelditu zirenak. Erabakia irailean hartu zuen epaitegiak, eta bitarte horretan administrazioak ez du helegiterik jarri. Epailea Ana María Martínez da, Laudioko Udala behartu zuena hizkuntza eskakizunak betetzen ez zituen funtzionario bat berriz ere kontratatzera. Euskara "munduko hizkuntzarik zailenen artean" dagoela argudiatu zuen orduan.

CCOO sindikatuak ere jarri zion helegitea Arkautiko lan poltsari, eta euskara mailaren baldintza kentzeko eskatu. UGTko kide den Jose Luis Ahedok adierazi du "ez duela zentzurik gaztelaniadun herrietan lan egiten amaituko duten hautagaiak kanpoan uztea euskara maila altua egiaztatu ez dutelako". 

Epaitegien erasoentzako protokoloa, Kontseiluak

Epai irmoa jakinarazi den egunean bertan, hilak 24, Euskalgintzaren Kontseiluak iazko balorazioa egin du eta 2023rako bide orria aurkeztu. Epaitegiek hizkuntza-eskubideen aurka emandako ebazpenei aurre egiteko protokoloa prestatzen ari dela aurreratu du.