Duela bi urteko Aste Nagusian eztabaida desatsegina izan zuen Arkaitz Zarraga euskaltzaleak zenbait udaltzainekin. Berak euskarazko tratua jasotzeko eskubidea zuela eta euskaraz hitz egiteko eskatu zuen, eta etxera 900 euroko isuna eraman zuen mozal legea apliakatuta, udaltzainei errespetua faltatu ziela adieraziz.

Maiatzaren 29an iritsi da epaia, honela jakianrazi du Zarragak: "Bilboko udaltzainekin izan nuen aferaren sententzia heldu da! Irabazi dugu! Isunak bertan behera utzi ditu epaileak! Hala ere epaia erdara hutsean! Eta sententzia epaile arrotz batena, argi eta garbi". Hari honetan xehetasun gehiago eman ditu.

"Sententzia irmoa da! Euskarazko bertsioa eskatuko dugu, jakina, baina ni behintzat, pozik bai, baina ez konforme. Argi dago justizia horrek ez dakarrela Justiziarik euskaldunontzat. Kontua da administrazio guztiek berdin egin behar duten. Batzuek badute aldatzen hasteko garaia! Dena dela, Bilbon bereziki, bada garaia herritik ere, azpitik gorantz, periferiatik erdirantz sakatzen hasteko. Gora Bilboko euskaldunak! Egurreeeeee", adierazi du.

Arkaitz Zarragak epaitegietara jo zuen jarri zioten isunaren aurka, eta udaltzainek adierazi zuten iraindu egin zituela. Zehazki, udaltzainetako batek "puta chula" deitu ziola euskaraz esan zuen. Hori izan da epaiaren gakoetako bat, Zarragak epaiketan esan baitzuen hori gezurra zela, ez zuela inor iraindu eta galdera bota zion bueltan ea nola esaten zen hori euskaraz. Udaltzainek ez zuten jakin.

"Isuna eskubidea urratu duenari jarriko baliote, gauzak aldatzen hasiko lirateke", adierazi zuen Zarragak ARGIAn egin genion elkarrizketa honetan, Eneka Alvarezekin batera.

Arkaitz Zarraga 1972an Bilbon jaio zen. Euskaltegiko irakaslea da, une honetan Basauriko Udal Euskaltegiko zuzendaria. Euskal Filologian lizentziatua, Soziolinguistika eta hizkuntzen irakaskuntza ditu arlo landuenak. UEUko glotodidaktikako sailburua da eta Hau Pittu Hau konpartsako kidea da.