CUPeko diputatu ohi Anna Gabriel Ginebran geratuko da eta ez da asteazkenean Espainiako Epaitegi Goreneko epaile Pablo Llarenaren aurrean aurkeztuko. Kataluniako pozesu soberanista bultzatzeagatik dago ikertua eta epaitegira deitua, beste hainbat politikari kataluniar bezala.

Le Temps egunkari suitzarrak egin dion elkarrizketan adierazi du Espainian bere ideia politikoengatik "jazarria" dela eta horregatik ez dela epaitegira joango.

Sarean ez dagoen elkarrizketa honen pasarte batzuk nabarmendu dituzte TV3en. Besteren artean, Anna Gabrielek dio "prentsa gobernamentalak" dagoeneko errudun izendatu duela. 

CUPek agerraldia deitu du arratsalderako Auzitegi Goreneko zitazio honi buruz informatzeko.