Aner Peritz "Euzkitze"k jantzi du irailaren 2an Lizardi sariko txapela bere herrian, Zarautzen. Andoni Rekondo hernaniarra izan zen bigarren eta berak eraman zuen bertso onenaren saria. Saio ederra eskaini zuten bi hauekin batera Naia Arrizabalaga, Gorka Pagonabarraga, Oier Etxeberria eta Aitor Tatiegi-k.
Aner Peritz "Euzkitze"k jantzi zuen txapela 46. Lizardi sarian, Iñigo Mantzizidor "Mantxi"ren eskutik. 25 urtez beherako bertsolariek hartzen dute parte Zarauzko sariketa honetan, eta 20 urte ditu txapeldun berriak. Saioak izan zuen maila nabarmendu dute bertan izan ziren bertsozaleek, baita Peritzek ere, bertsoa.eus webguneak egin dion elkarrizketan: "Saioa oro har oso ona iruditu zitzaion Euzkitzeri: «Ikusten nuen beste bostak ere nire aurretik geratu zitezkeela".
"Sortu nahi genukeen eta sortzen ari garen horri" eskaini dio txapela
Hona txapela buruan kantatu zuen agurra, bertso udalekuetan bizi izandakoari erreferentzia eginez, baina "beste esparru askotarako ere baliagarri":
Lizardin, Zarautzen, hola
nola ez ipini gorri?
txapel beste inon ez al
hegon nahiko egonkor hi?
Baina kuadrilla bat ez da
hona alferrik etorri
eta litozko txapel hau
hortik nahi dut eratorri
gure helburu, ideal,
utopi eta jatorri
gure festa, gure talde
gure ileetako zorri...
Txapela etorri bezela
nahiko nioke igorri
sortu nahi genukeen eta
sortzen ari garen horri.
Bertsoa webgunean daude ikusentzungai Lizardiko finaleko bertsoaldi hautatuak.