Apirilaren 1etik aurrera Amsterdamen 512.000 eurorainoko etxe bat erosten duen jabeak ondorengo lau urteetan bertan bizi beharko du. Espekulazioari eta etxebizitza krisiari aurre egiteko asmoz ezarri nahi dute neurria; izan ere, hiru etxebizitzatik bat inbertitzaile pribatuen eskuetan dago, Jakob Wedemeijer Etxebizitza zinegotziak jakinarazi duenez, eta prezio “oso garestietan” jartzen dituzte alokairuan.

Batez beste hilean 1.466 euro ordaintzen dute maizterrek, Publico.es agerkariak argitaratu duenez, eta diru-sarrera ertain edo baxuak dituztenek ez dute etxebizitzarako aukerarik. AT5 Amsterdameko hedabidearen arabera, azken zazpi urteetan jabea duen etxebizitzen prezioak “bikoiztu baino gehiago” egin dira, 600.000 eurora batez beste.

Otsailaren 9an eztabaidatuko dute neurria udalbatzan, eta hurrengo astean bozkatu, baina Wedemeijerrek aurreratu du erabakiak baduela nahikoa babes.