"Ez dago zalantzarik administrazioek egin dutela ahalegina hedabideak sustatzeko; hor daude hainbat hizkuntza politika, gorabehera askorekin, baina iraun dutenak; ez dut argi, ordea, administrazioak estregikotasun hori guk ikusten dugun moduan ikusten dutenik", gaineratu du.

Hizkuntzak biziberritzeko prozesuetan hiru hanka daudela dio Barandiaranek: irakaskuntza, administrazioa eta hedabideak. Hedabideak hizpide, erakunde publikoek ahaleginak egin dituztela esan du. "Baina ez dakit egin ote den gogoeta hori, kontuan hartzen ote den biziberritze prozesu horretan hirugarren hanka direla. Errealitateak esaten digu, gainera, eskolak ez dituela euskaldun osoak sortzen, erabilerak behera egin duela. Hor hedabideek asko egin dezakete. Estrategiko direla nabarmendu behar da. Ez da nahikoa diru laguntzak ematea".

Jaurlaritzaren diru laguntzek behera egingo dutela-eta

"Diru laguntzen kopurua ez da handia, eta jaitsierak heriotza zigorra ekar dezake hedabide askorentzat. Aurrekontu nagusietan betetzen duen portzentajea begiratuta, behera egin du laguntzak azken urteotan. Hor asmo politiko bat dago, eta ezin dugu onartu. Gora-behera horiek bazter uzteko landu nahi dugu hitzarmenarena. Patxi Baztarrika Eusko Jaurlaritzako Hizkuntza Politikarako sailburuordeak esan du hitzarmenaz hitz egiteko prest dela. (...) Oraingoz entzun ditugun hitzak dira murrizketak egongo direla. Guk ikusi nahi dugu zein den planteamendua. Hedabideek ezin dute onartu murrizketa gehiago, eta gure lana da horri aurre egitea".

Kudeaketa plana

"Orain, kudeaketa plana lantzen ari gara. Hilaren 27ko batzarrean erabakiko da. Ahots bakarra izan nahi dugu lau kontutan: elkartearen barne egituraketan; diru laguntzen auzian; publizitatearen esparruan, eskaintza komunak landu nahi ditugu; eta, azkenik, hedabideen behatokia bultzatu nahi dugu. Gero bakoitzak izanen ditu bere proiektuak eta asmoak, baina puntu horietan batera lan eginen dugu".