20 urteko gazte bat hil du Minessotako poliziak apirilaren 11n. Autopsiak baieztatu du bularrean jaso zuen tiroa dela heriotzaren zergatia. Hilketatik denbora gutxira hainbat lagun elkartu dira tirokatua izan zen tokian gertakaria salatzeko.
20 urteko Daunte Wright gizonezko afro-amerikarra hil du Minnesotako poliziak, Minneapolistik gertu dagoen Brooklyng Center hirian. Hennepin konderriko aztertzaile medikuaren bulegoak astelehen arratsaldean zehaztu zuen bularrean bala batek eragindako hilketa izan zela. Autopsia egin duen mediku bulegoa agintaritza independentea da.
Tim Gannon poliziaburuak aldiz, igandeko prentsaurrekoan hilketa "akats" bat izan zela esan zuen: Wrighti tiro egin zion agenteak, hura atxilotzen saiatu zenean, suzko arma taser batekin nahastu zuela.
Berria egunkarian irakur daitekeenez, hilketaren berri izan eta jarraian hainbat lagun elkartu ziren tiroketa gertatutako lekuan. Hildakoaren senideek lasaitasuna eskatu dute bertaratzeetan eta istilurik gabeko elkarretaratzea lortu zuten hasieran. Gauean tentsioa handitu egin zen eta hainbat pertsonek hiriko merkataritza guneei eta polizia ibilgailuei eraso egin zieten. Poliziak elkarretaratutako herritarren aurka jo zuen. Geroago, hurbildutako 500 pertsonak sakabanatu egin ziren AEBetako Guardia Nazionala heldu zen momentuan.
Protestek astelehen gauean ere jarraitu dute, ElDiario.es hedabidean irakur daitekeenez. Manifestariak Brooklyn Centerreko Polizia estazioaren aurrean batu ziren.
Black Lives Matter mugimenduak babesa erakutsi du.
There are no accidents in police terror and white supremacy.
— Black Lives Matter (@Blklivesmatter) April 12, 2021
Say his name.#DaunteWright
AEBetako presidente den Joe Bidenek ere gertakariaren inguruan hitz egin du bere Twitter kontuan.
Today I’m thinking about Daunte Wright and his family — and the pain, anger, and trauma that Black America experiences every day. While we await a full investigation, we know what we need to do to move forward: rebuild trust and ensure accountability so no one is above the law.
— President Biden (@POTUS) April 12, 2021
Maiatza amaieran beteko da urtebete Poliziak George Floyd afro-amerikarra itota hil zuela. Aste honetan hasi da Eric Nelson, gaztea hil zuen polizia ohiaren aurkako epaiketaren hirugarren astea. Epaiketa Floyden anaiaren eta Jonathan Rich kardiologoaren testigantzekin hasi da. Medikuak adierazi duenez, Floyden heriotza “erabat saihets zitekeen", eta baztertu egin du bihotz-gelditzeagatik edo drogen gaindosiagatik hil zela.