Donald Trump AEBetako presidentearen Gobernuak plan bat onartu du astelehen honetan: Alaskako Artikoko Basoko Bizitzaren Babes Nazionalaren eremua petrolioaren ustiapenera bideratzea. Neurri hori “indigenen eta eskualdeko ekosistemaren aurkako erasoa” dela gaitzetsi dute ingurumen taldeek. Litekeena da urtea amaitu baino lehen kontzesioak esleitzea babesleku osoan jarduteko. Babeslekuak 631.800 hektarea barnebiltzen ditu, eta hartz polarren edo karibuen habitat naturala da, besteak beste.

Kongresuak 1980an Alaskako ipar-ekialdea balizko petrolio ustiapenerako prestatzea ebatzi zuen arren, Artikoko babeslekua zulaketak egiteko debekatutako lurraldea izan da, errepublikanoek lau hamarkadatan petrolio enpresei ateak zabaltzeko ahaleginak egin dituzten arren. Hori dela eta, programaren ezarpena “mugarria” dela adierazi du David Bernhardt Barne idazkariak elkarrizketa batean. "Ez da errentamendu prozesuaren amaiera, baina oso mugarri esanguratsua da", gaineratu du.

Inbertsio zalantzagarriak

Sierra Club talde anbientalistak mezu batean adierazi d+uenez, "Kongresuko errepublikanoek zuzenketa bat egin zuten 2017an Artikoan zulaketak ahalbidetzeko, lege fiskal baten zati gisa, eta adierazi zuten 2024ko abendurako egin behar ziren bi kontzesiok 1.000 milioi dolar sortuko zituztela diru-sarreretan. Kopuru hori zalantzagarria zen jada aurtengo petrolioaren merkatuko kaosa baino lehen". Azken urtean AEBetako sei banku handietako bostek –Goldman Sachs, Wells Fargo, Chase, City eta Morgan Stanley–, Artikoko ustiategiak “inbertsio txarra” direla onartu dute, eta mundu osoko 20 finantza erakundere baino gehiagorekin bat egin dute euren inbertsio politikak eguneratu eta eskualde horretako zulaketen finantzaketa baztertzeko, Artikoko babeslekua barne. Ondorioz, ikuspegi ekonomiko hutsetik begiratuta ere hondamena izan daitekeela susma daiteke. "Trump Administrazioaren Babes Artikoko petrolio ustiategien berrikuspen prozesua hasieratik izan da lotsagarria", kritikatu du Lena Moffitt Sierra Clubeko kanpaina zuzendariak, eta erabakiaren aurka egingo dutela iragarri du.

Babes-legeak bortxatuz

Aldi berean, Earthjustice taldeak gogora ekarri duenez, "Gwich'in herri indigenak uste du Babes Artikoko kostaldeko lautada sakratua dela, arantzurdeentzat eta karibuentzat jaiolekua delako, Alaskako biztanleek elikadurarako eta tradizio kulturalerako behar dituzten animalientzat".

Erik Grafe Alaskako Earthjustice taldearen bulego erregionaleko abokatuaren esanetan, erabaki horrek "ez ditu aintzat hartzen basoko bizitza babesteko diseinatutako legeak". Administrazioak toki hori hondatzeko duen plana “legez kanpokoa” dela azpimarratu dute, “petrolio-irabazi pribatuak” lortzea beste helbururik ez duena, eta kereilak iragarri dituzte epaitegietan. Astelehen honetan ezagutu den planaren arabera, kontzesioen lehen lizitazioa 2021eko abenduaren 22an egingo da, baina Bernhardten arabera, “urtea amaitu baino lehen” egin daiteke.

Gehiengoa aurka

George Mason eta Yale unibertsitateek apirilean egindako inkesta batek erakusten duenez, eskualdeko boto-emaileen %33ak petrolio zulaketak babesten ditu, eta %67ak, berriz, aurka daude.