La Rèleve et La Peste hedabideak jakitera eman duenez, Tolosa-Castres autobidearen lanak aldi baterako gelditzea lortu dute grebalariek. A69 autobidea eraikitzeak ehun urte inguruko pinuak eta platanondoak erauztea ekarriko zuen, besteak beste. Ondorioz, ingurumen ekintzaile eta eskalatzaile Thomas Brailek irailaren 1ean gose greba hasi zuen Okzitaniako Vendine herrian.

Horrez gain, 24 orduz egon dira egarri greban Brail, Celik eta Reva izeneko hiru grebalari. Brailen osasun egoera kaskarra zela eta, ospitaleratu egin dute eta horren ondorioz A69 autobideko lanak bertan behera uztea erabaki dute, ostiralera arte behintzat. Egun horretan hartuko dute tokiko hautetsiak biltzen dituen bilkuran behin betiko erabakia. Bertan, A69aren aldekoak, proiektuaren aurkako kolektiboak, zientzialariak eta botere exekutiboak elkartuko dira.

Reva grebalariak adierazi du garaipena “kolektiboa” izan dela: “30 egun dira herritarrak gose greban sartu garela, baina 30 urte badira A69 autobidearen aurka asko borrokan ari garenak”. Frantziako Greenpeaceko zuzendari Jean-François Julliardek adierazi du proiektua "zentzugabea" dela, eta "kontuz ibiliko gara ostiralekoa ez dadin bilera soil bat izan, baizik eta ekintza indartsu bat”.

Thomas Brailek gainerako gose grebalariak borrokarekin jarraitzeko “libre” direla adierazi du: “Ez naiz haien nagusia, proiektuarekin nazkatuta dagoen herritar bat baizik”. Halaber, estatuarentzat, elkarteentzat eta haurrentzat “garaipena” izan dela nabarmendu du Brailek. Revak, aldiz, “garaipenaren hastapena” dela adierazi du, “presioa igotzea” lortu dutelako. Ostiralean jakingo dute zein izango den A69 autobidearen patua. Proiektuaren aurka diren tokiko hautetsiek adierazi dute lanak ostiralera arte egiazki etenda daudela ziurtatuko dutela.