50 apaiz gay italiarrek sinaturiko gutun irekiak hautsak harrotu ditu Eliza Katolikoan: ezin dutela beren sexualitateaz hitz egin, trabak jartzen zaizkiela eta seminarioetatik homosexualitatearen aurkako gorrotoa bultzatzen dela salatu dute.
Irailetik dabil batetik bestera Con tutto il cuore (Bihotz guztiarekin) gutuna eta aste honetan argitaratu du Domani agerkariak. Sinatzaileek diote bai seminarioetan bai Elizaren instituzioan homosexualitate zantzu guztiak ezabatzeko planak martxan direla, formatzen ari diren apaizengan moral sexual edukiz hutsa bultzatu asmoz. Baina Elizaren baitan beren lekua aldarrikatu nahi izan dute apaiz homosexualek.
“Ezin dugu gure sexu joeraz hitz egin senide eta lagunekin, zer esanik ez beste apaizekin”, diote, eta Elizak homofobia barneratua duela salatu dute. Are gehiago, apaiz gay homofoboak daudela adierazi dute sinatzaileek, barruan daramaten gatazka kanpoan deskargatzen dutenak. Apaiz homosexualentzat, “isiltasuna da bizirauteko modu bakarra”, eta hori aldatu nahi dute sinatzaileek.
Italian bezala Espainian, Elizak eskuin muturrarekin lotura handiak dituela eta horrek ere eragina duela iritzi diote gutunaren egileek. Giorgia Meloni agintera iritsi denetik, Eliza barruko dokumentuetan "genero ideologia" kasik obsesiboki erabiltzen dela kritikatu dute.