“Erronka handia zen baina lortu dugu. Bai horixe! 26 ordu, 500 kantu eta 1.000 parte-hartzaile baino gehiago! Bejondeigula!”. Horiek dira Izan Kantuz herri erronkaren antolatzaileek plazaratu dituzten lehen hitzak. 26 orduz etenik gabe euskaraz abesteko erronka ofiziala da, eta Official World Record erakundeak ziurtatu du dagoeneko. Bukaera hunkigarria izan du ekitaldiak, Kataluniari keinu eginez, Agure Zaharra abestu baitute antzokian bildutako guztiek. Euskal Herriko herri guztiak animatu dituzte erronka gainditzera: “Gustura emango diegu lekukoa”.

Izan Kantuz taldeak nabarmendu du herri erronka bat proposatu zutela eta herriak bere egin duela:  “Belaunaldien arteko transmisioa eta euskarazko kantagintza oinarri hartuta, herri oso bat kantuan jartzea lortu dugu. Herri nortasunaren eramaile izan da kantagintza Euskal Herrian, eta XXI. mendean, osagai horiek guztiak berreskuratu eta etorkizunari begira jartzea lortu dugu”.

Antolatzaileek sei hilabete eman dute dena prestatzen eta oso pozik agertu dira emaitzarekin: “Balorazioa bikaina da, ederra, gogobeteta gaude egindakoarekin”.

Lorpena behar bezala erregistratua gera dadin, Official World Record elkartearen onespena behar zen, eta hori da David Ventura elkarteko kideak bere testigantzarekin ziurtatu duena, “aurrez ezarritako baldintza guztiak bete baitira”.

Erronkak iraun duen bitartean, hainbat pertsonaia ezagun ere pasatu dira Zaldibiako antzokiko oholtzatik: Jose Mari Agirretxe Porrotx, Maider Zabalegi, Mikel Markez, Zuriñe Hidalgo, Jon Urdangarin, Aitziber Garmendia eta Iker Galartza, eta Xabier Saldias eta haren taldekideak, besteak beste. “Zuei ere eskerrak, erronka hau lau haizetara zabaltzen laguntzeagatik”.

Flickerreko helbide honetan jarri dituzte ekitaldiko dozenaka argazki eta beste honetan bideo guztiak ikusgai. Hala ere, antolatzaileek hainbat bideo aukera nabarmendu dituzte: zuzeneko emisioa, Zuriñe Hidalgo abeslariarekin egindakoa eta lehen hamasei orduen laburpena.