Seaskako Integrazio Batzordeak 200.000 euro lortzeko kanpaina martxan jarri duela jakitera eman du Kanbon eginiko prentsaurrekoan. Frantziako Hezkuntza ministerioak behar bereziak dituzten haurrentzako laguntza bermatzen ez duela salatu dute beste behin ere. Parisekin dituzten elkarrizketetan gaia mahai gainean jarria dutela erran dute Seaskako eta Integrazio Batzordearen ordezkariek, baina administrazioa mugitzea itxaron gabe, ikastolek gogoeta egin dute inklusioaren esku hartzea hobetzeko: "Antolaketa propioa " sortu nahi dute egoera zailari aurre egin ahal izateko. Diru zama biltzeko bidean, herritarrei dei egin diete, eta Internet bidez egin daiteke sos ekarpena.

Ikastolen sarean dabiltzan 165 ikasleei babesa ematen jarraitzeko helburua dute. "Elbarritasunaren" aitortza MDPH Elbarrien Departamenduko Etxeak ematen die eta printzipioz, haur bakoitzari AESH edo Desgaitasun Egoeran dagoen Ikaslearen Laguntzaile bat esleitzen zaio ondotik. Baina Integrazio Batzordeak argi utzi du zerbitzu hori ez dela betetzen: 2023-2024ko ikasturtetik Seaskan eskolatuak diren ikasleek jaso dituzten giza laguntzako jakinarazpen berri guziak erantzunik gabe gelditu dira.

Seaskaren sareari dagokionez, Frantziako Estatuak gaur egun 34 laguntzaile ditu soldatapean –baina horiek ere egoera kaskarrean dira eta ez dute lortzen laguntza behar bezala bideratzen–, eta Integrazio Batzordeak aldiz, hamaika, horiek 67.000 euroko gainkostua sortzen diotelarik. 200.ooo euroren beharra dute, beraz, gastu horiei eta aurreko ikasturtekoei erantzun ahal izateko.

Seaskako AESH laguntzaileen koordinazioaren arduradun Joana Goienetxek langileek duten prekarietatea salatu du: "952 euro ordaintzen zaizkie %60ko lanaldiagatik, horrekin ez dituzte elbarrien beharrak guztiz asetzen". Hezkuntza ministerioaren partetik den langileen prestakuntza eskasa ere deitoratu dute: "60 orduko formazioa izaten dute Hezkuntza Ministerioak eskainia; baina batzuetan urte bukaeran ematen diete".