"1620, Nafarroako Lo(r)aldia" programa aurkeztu dute Donapaleun, urriaren 3an bertan ospatuko den jardunaldiaren mamia ezagutaraziz. Prentsaren aurrean ziren Donapaleuko auzapez hautatu berri Charles Massondo, Amikuzeko Zabalik elkarteko Mattin Irigoien, Nabarraldeko zuzendari Angel Rekalde eta Jean Louis Davant historialari eta idazlea. Urriaren ekitaldiak leku horretan beran burutuko dira, fraide frantziskotarren konbentu izan ostean gaur Bideak-Chemins kultur zentroa den horretan.

 

Aurkezpenean esan dutenez, "1620an, duela 400 urte, ziklo historiko bat itxi zen: Nafarroako kulturaren garairikloriatsuena, aberatsena eta garaiena. Garai laburra izanagatik ere kulturalki emankorrena izan zen baina, tamalez, gertaera politiko jakin batekin eman zitzaionitxiera: Paueko ediktua, Frantziako Luis XIII-aren eskutik iritsi zena. Ediktu honen bitartez Nafarroa Frantziako koroarekin bateratu zuen erregeak, eta gure lurraldeak bere subiranotasuna behin betiko galdu zuen". Garai oparo hura ahanzturatik ateratzeko helburuz osatu da urriaren 3ko programa izenburutzat daramana "Nafarroako Lo(r)aldia".

 

"Atal historiko honek –esan dute antolatzaileek– bi esanahi garrantzitsu eskaintzen dizkigu: alde batetik, ia mila urtez jardun zuen eta nazioarteko mapan Euskal Herria kokatzen zuen Europako Estatu baten amaiera. Bestetik, etapa berezi eta bikain baten amaiera (Shakespearek ‘Nafarroa munduaren mirespena izango da’ esaldi ezaguna idatzi zuenekoa): Nafarroako Errenazimendua kulturaren, pentsamenduaren eta artearen arloan, euskal gizarteari Europa mailan izugarrizko distira eman ziona”.