Duela astebete jakin zen, Alearen bidez, Gasteizko Udalak Mozal Legea aplikatu ziela hiru herritarri farol batetik ikurrina zintzilikatzeagatik. Zigortutako hiru pertsonetako batek Aleari azaldu zion gertatutakoa: apirilaren 1eko goizez, Aberri Egunaren bezperetan, Zabalgana auzoko Buradon Gatzaga Parkeko farola batean ikurrina zintzilikatzen ari zirela Udaltzaingoaren bi patruila hurbildu zitzaizkien beraiek identifikatu asmoz. Antza, ikurrina zintzilikatzen ari zirela-eta, bizilagun batek dei anonimoa egin zuen Poliziari abisu emateko. Herritarren Segurtasunerako Sailak Mozal Legearen 31.13 artikuluaren arau-hauste arina egotzi ondotik, Gasteizko Udalak 100na euroko isuna jarri zien, "erabilera edo zerbitzu publikoko ondasun higigarriak edo higiezinak kaltetzea edo hondatzea" leporatuta.

Aste baten buruan, Mozal Legearekin zigortuek 300na euroko isuna jaso dute, "erabilera edo zerbitzu publikoko ondasun higigarriak edo higiezinak kaltetzea edo hondatzea" leporatuz. Isun horiek, Aleak zehaztu duenez, Ana Oregi zinegotziak (EAJ) zuzendutako Lurraldearen eta Klimaren Aldeko Ekintzaren Sailaren bitartez helarazi zaizkie, argudiatuz Garbiketari eta Hondakinen Bilketa eta Garraioari buruzko Udal Ordenantzaren 147.1 artikuluaren arau-hauste arina burutu dutela. Bertan ageri da, arau hauste arinen artean, ondoko adibidea: “Kartel, pankarta, banderatxo, eranskailu edo antzekoak —gehienez 10 ale— jartzea, aurretiazko jakinarazpena egin gabe edo Udalak berariaz baimendu edo ezarritako tokietatik kanpo”.

300na euroko hiru isunekin 900 euro gehiago ordainarazi nahi diete ikurrina zintzilikatu zutenei. Aurreko isunei batuz gero, 1.200 euro eskatzen dizkie Gasteizko Udalak. “Mozal Legearekin nahikoa ez, eta ordaindu beharrekoa laukoiztu egin digu Udalak”, salatu du hiru zigortuetako batek Aleari egindako adierazpenetan.

Mozal Legean oinarritutako isunei helegitea jarri diete dagoeneko hiruek, eta isun berrien kasuan ere errekurritzeko asmoa dute, xehetasunak aztertzen ari diren arren.