argia.eus
INPRIMATU
100 urteko ibilbidea aldarrikatuko dute aurten Gasteizko gaztetxeak, Hala Bedi irratiak, Auzolana pilotalekuak eta Sumendi guneak
  • 100 urte, bakarrik ezin da! dinamika aurkeztu dute, okupazioan, autogestioan eta asanblearismoan oinarritutako borrokei “indarra emateko”. Hurrengo hilabeteetan hainbat ekimen burutuko dituzte, eta urriaren 21ean emango diote amaiera dinamikari, kalean.

Zigor Olabarria Oleaga @zoleaga1 2023ko martxoaren 31
Argazkia: 100 urte, bakarrik ezin da! dinamika

“Bizirik eta kaña ematen jarraitzeko gogoz jarraitzen dugula ospatzeko” antolatu dute dinamika, ostegunean prentsaurrekoan azaldu dutenez, eta “urte hauetan guztietan elkartu gaituzten ideia eta lan egiteko moduei indarra emateko”. Horien artean azpimarratu dituzte asanblearismoa, autogestioa eta okupazioa. Inauterian jada kalejira antolatu zuten dinamikaren baitan, eta haurrera begira ekimen gehiago izango direla iragarri dute. Itxiera urriaren 21ean emango diote: “Egun horretan, kalera aterako gara berriro, eta 100 urte baino gehiago eraikitzen daramagun Gasteiz berriz ere aldarrikatu eta defendatuko dugu”.

Mahai jolas baten metafora baliatu dute antolatzaileek dinamika azaldu eta espazio bakoitzaren historia eta ekarpenak zerrendatzeko. Gogoratu dute Hala Bedi Irratia 1983 urtean jaio zela (40 urte egiten ditu aurten), eta “zentsurari, errepresioari eta legalitateari” aurre eginez bihurtu dela “ahotsik ez dutenen bozgorailu”. Gaztetxeak 1988an okupatu zituen apezpikuaren kotxerak (35. urteurrena ospatuko du aurten), eta besteak beste akordura ekarri dituzte gaztetxea lurrarekin berdindu nahi zuen Alfonso Alonsori Gasteizko herri mugimenduak irabazitako “borroka ederra”. 2008an okupatu zuten auzokideek Auzolana pilotalekua (aurten 15 urte), “Alde Zaharreko behar eta nahietara moldatuz”. Pilotalekuak ere irabazi behar izan du borrokarik bizirik jarraitzeko: Gorka Urtaran alkate jeltzalearen gobernuaren aurkakoa, Gasteiz Antzokia eraikitzeko proiektua bertan ezarri nahi izan zuenean. Errekaleorren 2013an hasi ziren, 10 urte direla beraz, “hilzorian zegoen auzo bat biziberritzen”, eta goraipatu dituzte “Iberdrolaren eta Urtaran Karapan-en” argi mozketari nola eman zion auzoak buelta, “energia eta elikadura burujabetza” garatuta. Judimendi auzoko Sumendi gunea izan da jaiotzen azkena, 2016an, zazpi urte “geroz eta zahartuago dagoen auzoa gazte-berritzen”, eta joko aretoen aurka egindako lana oroitu dute.

100 urte gehiago

“Jarrai dezagun beraz 100 urtez gehiago autogestioa bultzatzen, bultza dezagun herritarron auto-antolakuntza, jarrai dezagun gustuko ez gaituzten araugileei begietan atzaparra sartzen, proiektu berriak sortzen, herri boterea eraikitzen eta defendatzen. Garatu ditzagun gainera, herritarron arteko lotura sendo zein zintzoak, horrela bakarrik irabaziko diogu partida etsaiari: elkarrekin eta ez banandurik. Batu partidara! 100 urte, bakarrik ezin da!”, amaitu dute hitzartzea.